Туркия 60 йил аввалги Олимпиадаги триумфни нишонлаяпти

Ўша пайтларда эркин ва юнон-рим кураши баҳсларида 8 тадан медаллар жамғармаси ўйналарди. Босфор бўғози паҳлавонлари тўрт йилликнинг энг нуфузли мусобқасида 7 та олтин, 2 та кумуш медалини қўлга киритишган эди. Рим гиламларидаги муваффақиятли иштирок Туркия кураши тарихида  эришилган энг катта ғалаба ҳисобланади. Куни кеча ушбу тарихий воқейликка роппа-роса 60 йил тўлди.  

Туркия эркин курашчиларидан Мустафа Дагистанли (суратдаги) финалдаги ғалабадан кейин гиламни ўпиб, фаолиятини якунлаганини эълон қилган. У икки карра Олимпиада, уч карра жаҳон чемпиони бўлган. Шунингдек, Исмет Атли, Хассан Гёнгор, Ахмет Билек сингари полвонлар ҳам чемпионлик йўлида кучли рақибларини мағлуб этиб, шохсупанинг энг юқори поғонасига кўтарилишганди. 

Туркия кураш федерацияс президенти Муса Айдин Римдаги тарихий триумф ҳақида шундай деди: "Курашчилар барча даврларда ҳам Туркия спортининг байроқдорларидан бўлган. Айнан улар бундан 60 йил аввал Римда тарих ёзишган. Биз ҳамиша уларни эслаймиз ва ёшларга ўрнак сифатида кўрсатамиз".

Маълумот учун, туркиялик спортчилар 1936 йилги Олимпиададан то шу кунгача жами 91 та медаль (38 та олтин, 25 та кумуш, 28 та бронза) қўлга киритишган. Шулардан 63 медаль (29-18-16) айнан курашчиларга тегишли.