Туркманистон Олимпиададаги иштирокини медалсиз якунлади

Лекин тўрт йилликнинг энг нуфузли мусобақасида иккита миллий рекорд янгиланди. Рио Олимпиадасида Туркманистон терма жамоаси 9 нафар спортчи билан иштирок этди. Улар дзюдо, оғир ва енгил атлетика, бокс ва сузиш мусобақаларида ўз имкониятларини синовдан ўтказишди.

Туркманистонлик спортчилар орасидан сўнгги бўлиб Аманмурод Хоммадов енгил атлетиканинг босқон улоқтириш мусобақасида иштирок этиб, 33 спортчи орасида 30-ўринни эгаллади.

Туркманистон терма жамоаси учун Рио Олимпиадасидаги энг яхши натижа – 13-ўрин бўлди. Бу натижага боксчи Арасланбек Очилов ва оғир атлетикачи Гулнабат Қодирова эришди. Қодирова икки курашда 195 килограмм тошни ўзига бўйсундирди. Сузиш мусобақасининг чалқанча усулдаги баҳсларида иштирок этган Мердан Атаева 100 метр масофада 56,34 сония натижа билан миллий рекордни янгилади.

Эслатиб ўтамиз, Туркманистон терма жамоаси Олимпиадада 1996 йилдан бери иштирок этиб келади. Лекин ҳозирча уларга тўрт йилликнинг энг нуфузли мусобақасида медал олиш насиб қилмаяпти. Айнан Туркманистон МДҲ ва Болтиқбўйи мамлакатлари орасида Олимпиада медалини олмаган ягона давлат хисобланади.