«У истеъдодини беҳуда сарфламоқда» - Канело Райан Гарсияни танқид қилди

Сауль Калеб Плант билан бўлажак жанг олдидан уюштирилган матбуот анжуманида жамоадоши - енгил вазн тоифасидаги америкалик Райан Гарсияни танқид қилди. Аввалроқ Сауль Cоmplex'га берган интервьюсида Гарсияга очиқчасига насиҳат қилиб, жамоатчиликни ҳайратлантирган эди. Плант билан матбуот анжуманида ҳам ушбу гапларини такрорлади.

«Мен у билан гаплашганим йўқ. Чунки Райан операциядан энди тузалмоқда. Аммо, менинг у ҳақида айтганларим ёмон маънода эмас. Бу яхши маънодаги танқид. Мен Райан яна бир бор тўғри йўлга кириш учун мотивация олишини истайман.

Қаранг, Райан жуда буюк истеъдодга эга. Бироқ, менинг назаримда у кўп вақтини ва истеъдодини беҳуда сарф этмоқда. Гарсияни кузатиб туриб, у ўзини 100% боксга бағишлаганини кўрмаяпман. Бу биз учун бу ёмон сигнал. Биз унга ҳамиша жамоадош сифатида спорт залига келиш, машғулот қилиш ва янги нарсаларни ўрганишни эслатиб турамиз. 

Чунки барчамиз спорт залида бўлишимиз зарур. Сиз йилига 5 марта жанг қилишга тайёрланасиз. Фаолиятимни бошлаганимда бир йил ичида 15 та жанг ўтказдим. Шундай экан, Райан бироз фидоий бўлиши лозим», - деди Канело.