Уайлдер Усикка қарши жанг ҳақида: "Умид қиламанки, у ўз сўзида туради"

Америкалик боксчининг сўзларига кўра, 15 октябрь куни навбатдаги жангида у Роберт Хелениусни мағлуб этганидан сўнг, украиналик боксчига қарши рингга кўтарилади.

"Тўғридан-тўғри чемпионлик жанги ўтказиш ниятидаман. Хелениусга қарши жанг оқшомига Александр Усик келишини ва Роберт ғалаба қозонса, у мажбурий даъвогарга айланишини эшитдим. Усик жанг ғолибига қарши курашишини айтди. Мен уни қадрлайман ва умид қиламанки, Усик ўз сўзида туради. Хелениусни мағлуб этганимдан сўнг, Усик ва мен унинг барча камарлари учун курашамиз.

Фаолиятим давомида бошқа боксчилар билан чемпион сифатида курашганман, шунинг учун бошқа томонда бўлиш ёқимли. Бу ерга келиш учун кўп нарсани бошдан кечирдим. Шунинг учун Усикка қарши жанг ажойиб бўлиши аниқ. Лекин Хелениусга паст баҳо бериш керак эмас. Усикдан кейин ҳам ажойиб тўқнашувлар, жумладан, Энди Руис билан ҳам жанг бўлади", - дея Уайлдернинг сўзларини келтиради Mirror.

Аввалроқ, менежер Эгис Климас Усик — Фьюри жанги ташкил этилмаса, украиналикнинг Деонтей Уайлдер билан жанг ўтказиш нияти борлигини айтганди.