Уч нафар боксчимизнинг барида ғалаба, Мирзахалилов камар соҳиби!

Қувонарлиси, Миразизбек Мирзахалилов, Ҳавасбек Асадуллаев ва Халимжон Мамасолиев ўз жангларини ғалаба билан якунлаб олишди. Икки карра Олимпиада чемпиони Ҳасанбой Дўсматов турнирга фахрий меҳмон сифатида таклиф этилганди. 

"IBA.PRO 20" турнири доирасида иккинчи ўта енгил вазн (55,3 кг) тоифасида 10 раунд этиб белгиланган жангда IBF European камари ўртага қўйилди. Ушбу камар учун Миразизбек Мирзахалилов (6-0, 5 КО) россиялик  Чингиз Натиров (10-1, 5 КО)га қарши рингга кўтарилди. Рақиб жиддий - 10 та жангнинг барида ғалаба қозонган, беш нафар рақибини нокаутга учратган эди. Шунга қарамай, Миразизбек Натировни техник нокаутга учрата олди. Тўртинчи раунддан сўнг мезбон боксчининг мураббийлари жангни давом эттирмасликка қарор қилишди. Мирзахалилов IBF European камарини қўлга киритди.  

Супероғир вазнда жанг қилувчи боксчимиз Халимжон Мамасолиев (вазни 97,8 кг) россиялик Герман Скобенко (вазни 111,4 кг)га қарши тўлиқ 10 раундлик жанг ўтказди ва якунда ҳакамларнинг якдил қарори билан ғалаба қозонди. 

Ярим ўрта вазн (66,7 кг) тоифасидаги чарм қўлқоп устамиз Ҳавасбек Асадулаев (8-0, 5 КО) эса россиялик тажрибали Сергей Лубкович (20-0-2, 12 КО)ни 10 раундлик жангда очколар (98-92, 97-93, 96-94) ҳисобига кўра таслим этди. Бу Лубковичнинг фаолиятидаги илк мағлубияти бўлди. У 23-жангига келиб проф рингдаги илк мағлубиятини айнан ўзбек боксчисидан қабул қилиб олди. 

Шу тариқа, уччала боксчимиз ҳам россиялик рақибларини мағлубиятга учратишга муваффақ бўлди.   

Оқшомнинг асосий жанги иккинчи ўрта вазнда IBF European камари учун кечди. Унда ҳаваскор боксда ўтган йилги жаҳон чемпиони россиялик Жамбулат Бижамов (4-0) жаҳон чемпионати бронза медали совриндори, Сербия шарафини ҳимоя қилаётган Владимир Мирончиков (8-1, 6 КО)га қарши рингга кўтарилди. Ўн раунд тўлиқ давом этган жангда Бижамов очколар (97-93, 96-94, 96-94) ҳисобига кўра зафар қучди.