Уч спортчимиз Kazakhstan Junior Golf Invitational 2026 турнирида ғолиб ва совриндор бўлди

Икки кун давомида ўсмирлар ўртасида турли ёш тоифасида ташкил этилган халқаро мусобақада етти мамлакат — Қозоғистон, Озарбайжон, Ҳиндистон, Қирғиз Республикаси, Ўмон, Бирлашган Араб Амирликлари ва Ўзбекистоннинг энг яхши ёш гольфчилари ғолиблик учун кураш олиб бордилар.

Турнир "Nurtau" va "Zhailjau" гольф клублари майдонларида "Stroke Play (Gross)" форматида ўтказилди. Унда ғолиблар 36 та лунка бўйича энг кам зарбалар йиғиндиси асосида аниқланди.

Ҳар бир раунд спортчилардан максимал диққат-эътибор, тактик фикрлаш, матонат ва энг мураккаб ўйин вазиятларида тўғри қарор қабул қилиш қобилиятини талаб қилди.

Ўзбекистон терма жамоаси вакили Алибек Иноятов ёш тоифасидан қатъи назар, турнирнинг энг яхши мутлақ натижаси учун "BEST GROSS" махсус соврини билан тақдирланди. Ушбу мукофот анъанавий тарзда мусобақа давомида энг юқори ўйин даражасини намойиш этган спортчига топширилади.

Қозоғистон гольф федерациясида таъкидлашларича, турнирнинг асосий қадриятларидан бири бу нафақат медаллар учун кураш, балки ёш спортчилар учун халқаро мусобақа тажрибасини орттириш, ўз кучларини энг кучли тенгдошлари билан ўйинда синаб кўриш, тажриба алмашиш ва катта жаҳон гольф ҳамжамиятининг бир қисмига айланиш имкониятидир.

Ғолиб ва совриндорларимиз:

Олтин медаллар

Амира Талипова — (Girls 15-16 ёш)

Алибек Иноятов — (Boys 15-16 ёш)

Кумуш медаль

Максим Пак — (Boys 13-14 ёш)