UFC Fight Night 173 турнирининг марказий жанги бекор қилинди. Нега?

Бунга спортчида аниқланган коронавирус сабаб бўлди. Оқшомнинг марказий жангида собиқ UFC чемпиони Холли Холм мексикалик Ирен Алданага қарши октагонга кўтарилиши лозим эди. Жангга бир ҳафта қолган бир пайтда олинган таҳлил Иренда коронавирус борлигини тасдиқлаган. Бу маълумотни шахсан UFC президенти Дэна Уайт ҳам тасдиқлади.

Алдананинг ўзи ҳам ижтимоий тармоқдаги саҳифалари орқали коронавирусга чалингани ҳақидаги хабарни берган. Ирен ҳозир ўзини яхши хис этаётгани, ҳамон Холм билан жанг қилиш истаги борлиги ва бу режа октябрь ойида амалга ошишини қўшимча қилган. 

Энди 1 август куни ўтказиладиган UFC Fight Night 173 турнирининг марказий жанги Дерек Брансон ва Эдмен Шахбазян ўртасида бўлиб ўтади. Брансон ва Шахбазян UFC ўрта вазн тоифаси рейтингининг ТОП-10 жангчилари қаторидан жой олган.