UFC Fight Night 199: Марказий жангда "Қора Маҳлуқ" UFC рекордини янгилади

UFC Fight Night 199 турнирининг марказий жанги оғир вазн тоифасида ўтказилиб, унда чемпионлик учун собиқ даъвогар Дерик Льюис нокаутчи  Крис Дакасга қарши октагонга кўтарилди. 

Жанг бироз кутилмаган натижа билан якунланди. "Қора Маҳлуқ" номи билан танилган Деррик биринчи раунднинг ўзидаёқ нокаутчи рақибини нокаутга учратди. Учинчи дақиқа ўтиб бораётган бир паллада Льюис Крис Дакасга зарбалар ёмғирини ёғдирди. Натижада рефери Марк Смит жангни тўхтатишга мажбур бўлди. 

Деррик Льюис бундан аввалги чемпионлик жангида Сирил Ганга имкониятни бой берган эди. Бугунги ғалабаси эвазига у нокаутлар бўйича UFC`нинг мутлақ рекордчисига айланди. Шу кунгача Деррик Льюис биринчи ўринни Мэтт Браун ва Витор Белфортлар билан бўлишиб келаётганди. Бу икки жангчининг ҳисобида 12 тадан нокаутли ғалаба бор. 

Оғир вазнлилар рейтингида учинчи ўринда бораётган 36 ёшли Деррик яна чемпионлик камари учун октагонга чиқишини маълум қилди.