UFC Fight Night 274 турнирининг асосий жанги ҳам эълон қилинди + ПОСТЕР

UFC матбуот хизмати томонидан UFC Fight Night 274 турнирининг асосий жанги расман эълон қилинди. Унда ярим ўрта вазн тоифаси вакиллари Шон Брэди ва Хоакин Бакли ўзаро октагонда тўқнаш келади. 

Ҳар икки америкалик ҳам даъвогарлар пойгасидаги мағлубиятдан сўнг октагонга қайтади. Брэди ўтган йилнинг ноябрь ойида биринчи раунддаёқ Майкл Моралесга техник нокаут билан ютқазиб, учта ғалабадан иборат сериясини тўхтатганди. Бакли эса июнь ойида Камару Усманга ҳакамларнинг якдил қарори билан ютқазиб, кетма-кет еттинчи ғалабасини қўлга кирита олмаганди.

Айни пайтда Шон Брэди ва Хоакин Бакли UFC ярим ўрта дивизиони рейтингида мос равишда олтинчи ва тўққизинчи поғоналарни эгаллаб турибди. Айнан Бакли ҳамюртимиз Нурсултон Рўзибоевнинг ягона мағлубиятига сабабчи бўлганди.