Улар Олимпиадага боришади - Марина Хмелевская

Бугунги қаҳрамонимиз енгил атлетика бўйича Ўзбекистон терма жамоаси аъзоси Марина Хмелевская.

Марина Хмелевская – Германиянинг Берлин шаҳрида 42 км. масофага ўтказилган марафонда 2 соату 38 дақиқа 39 сонияда марра чизиғига етиб келиб, Рио-де-Жанейро шаҳрида ўтказиладиган XXXI ёзги Олимпия ўйинларига йўлланмани қўлга киритган. Ўз тарихида 42-бор ўтказилган мазкур марафонда 131 давлатдан 41 минг нафардан зиёд спортчи иштирок этган. Хотин-қизлар ўртасида бўлиб ўтган мусобақада Ватанимиз шарафини ҳимоя қилган Марина Хмелевская белгиланган меъёрдан қарийиб 4 дақиқа аввал маррага етиб келди ва тўрт йилликнинг энг йирик спорт анжуманида қатнашиш имкониятига эга бўлди. Ушбу мусобақада кениялик Гладис Черено 2 соат 19 дақиқа 25 сония натижа билан биринчи ўринни эгаллади. Кучли учликдан эфиопиялик атлетлар Аберу Кебеде ва Месерет Хайлулар жой олишди.

Эркаклар ўртасида ўтказилган марафонда эса кениялик Элиуд Кипчоге ва Элиуд Киптануи мос равишда биринчи ҳамда иккинчи ўринларни эгаллашган. Кучли учликни эфиопиялик Фейиса Лилеса якунлаб берган. Мазкур мусобақада иштирок этган ҳамюртимиз Андрей Петров 2 соату 23 дақиқа 24 сония вақт натижаси билан 61-ўринни банд этган эди. Эслатиб ўтамиз, Анлрей Петров ҳам тўрт йилликнинг энг нуфузли мусобақасида юртимиз спорт шарафини ҳимоя қилади. Ундан аввалроқ енгил атлетикачиларимиздан Ситора Ҳамидова, Светлана Радзивил, Сухроб Хўжаевлар ҳам Рио-2016 ўйинларига белгиланган меъёрларни бажаришган эди.