Улуғбек, Диёра ва Светлананинг ҳарбий унвонлари ошди + ФОТО

Маросимни мудофаа вазири генерал-лейтенант Баҳодир Қурбонов сўз билан очиб берди. ХХХIII ёзги олимпия ўйинларида мамлакатимиз терма жамоаси 8 та олтин, 2 та кумуш ва 3 та бронза медали билан умумжамоа ҳисобида 13-ўринни эгаллаганди. Қурбонов ўз сўзида мудофаа вазирлиги спортчилари ушбу нуфузли мусобақада 2 та олтин ва 1 та кумуш медалини қўлга киритганини эътироф этди. Бу спортчилар мудофаа вазирининг тегишли буйруғи билан тақдирланишди. 

Хусусан, -52 кг вазн тоифасида дзюдо бўйича аёллар ўртасида Ўзбекистон тарихида илк олтин медаль соҳибаси Мудофаа вазирлиги Олий спорт натижаларини ривожлантириш маркази спортчиси, лейтенант Диёра Келдиёровага муддатидан олдин навбатдаги "катта лейтенант" ҳарбий унвони топширилди. Шунингдек, у "Тўмарис" кўкрак нишони билан ҳам тақдирланди. 

-68 кг вазн тоифасида таэквондо спорти бўйича Ўзбекистон Республикаси тарихида илк икки карра Олимпиада олтин медаль соҳиби, Мудофаа вазирлиги Олий спорт натижаларини ривожлантириш маркази спортчиси кичик сержант Улуғбек Рашитов бошланғич офицерлик "лейтенант" ҳарбий унвони билан тақдирланди. 

Таэквондо спорти бўйича аёллар ўртасида ўзбекистонлик илк кумуш медаль соҳибаси, Мудофаа вазирлиги Олий спорт натижаларини ривожлантириш маркази спорт бўлими спортчиси кичик сержант Светлана Осиповага ҳам бошланғич офицерлик "лейтенант" ҳарбий унвони топширилди. Бундан ташқари, у ҳам "Тўмарис" кўкрак нишони билан ҳам тақдирланди. 

Париж-2024 ёзги Олимпия ўйинларига тайёргарлик кўришдаги фаоллиги ҳамда хамкорлиги учун Олий спорт натижаларини ривожлантириш маркази ўқитувчи тренери – Қуролли Кучлар хизматчиси Хан Павел Афанасевич икки хонали уй билан; 

-57 кг вазн тоифасида бокс спорти бўйича аёллар ўртасида ўтказилган мусобақаларда матонат ва жасорат кўрсатганлиги учун Мудофаа вазирлиги Олий спорт натижаларини ривожлантириш маркази спорт бўлими спортчиси – оддий аскар Турдибекова Ситора Шавкат қизи "Тўмарис" кўкрак нишони билан тақдирланди.

Мудофаа вазирлиги Ахборот ва оммвий коммуникациялар департаменти