Умид Аҳмаджонов ва ўзбек футболининг бир қатор юлдузлари «Талабалар кубоги-2018» мусобақасида иштирок этишди

Ўзбекистон Миллий олимпия қўмитаси, Ўзбекистон футбол ассоциацияси ҳамда Тошкент давлат иқтисодиёт университети ҳамкорлигида ўтказилган мусобақанинг финал учрашуви юқори савияда ташкил этилди.
Мазкур спорт байрамида Ўзбекистон Миллий олимпия қўмитаси Президенти ва Ўзбекистон футбол ассоциацияси биринчи вице-президенти Умид Аҳмаджонов ҳам иштирок этди. МОҚ раҳбари финал учрашувини очиб бериш олдидан университетнинг спорт майдончаси, умуман, ушбу илм даргоҳида йўлга қўйилган спорт тизими билан танишди.

Финал учрашувида ўзбек футболи афсоналари, XII Осиё ўйинлари чемпионлари Миржалол Қосимов ва Азамат Абдураимов, шунингдек, Миллий терма жамоамиз футболчилари Марат Бикмаев ва Сардор Рашидов, Хитойда ўтказилган ёшлар ўртасидаги Осиё чемпионати ғолиблари ҳам иштирок этиб, тадбирнинг янада қизиқарли кўриниш олишини таъминлаб беришди.

Тадбирни Ўзбекистон Миллий Олимпия қўмитаси Президенти Умид Аҳмаджонов ҳамда Тошкент давлат иқтисодиёт университети ректори Баҳодир Ходиевлар очиб беришди.

«Ассалому алайкум ҳурматли талабалар, устоз ва мураббийлар. Тошкент давлат иқтисодиёт университетида футбол мусобақаси старт олаётганида жуда хурсанд бўлгандик. Спортимиз ривожи йўлида ҳар бир бўғин – боғча, мактаб, коллеж ва университетларга алоҳида эътибор қаратилади. Мана, Суперлига баҳсларини эпақайга келтирдик, Ўзбекистон кубоги баҳсларини ўтказишда Англия футбол тизимидан андоза олдик, энди талабалар спорти йўналиши бўйича ҳам керакли ишлар олиб борамиз. Ташкил этилган ушбу спорт байрамини кўриб мамнун бўлдим. Барча-барчага раҳмат айтаман», – деди Умид Аҳмаджонов.

Тадбир давомида ўзбек эстрадасининг ёрқин юлдузлари Тоҳир Содиқов, Зоҳиршоҳ Жўраев, «Божалар» гуруҳи хонандалари ўз чиқишлари билан томошабинларнинг кўнглини ҳушнуд этишди.

Университетнинг «Корпоратив бошқарув» ҳамда «Банк иши» жамоалари ўртасида ўтказилган финал баҳсини FIFA ҳаками Равшан Эрматов бошқариб борди.

Учрашувда «Корпоратив бошқарув» жамоаси футболчилари кичик 1:0 ҳисобида ғалаба қозониб, мусобақанинг бош мукофотини қўлга киритдилар. Таниқли шарҳловчи Даврон Файзиев, шунингдек бутун ўйин давомида спортчиларни қўллаб-қувватлаб турган ЎФА қошидаги мухлислар клуби аъзолари тадбирга ҳақиқий байрамона руҳ бағишлай олишди. Тадбир давомида ёғиб турган ёмғир эса байрам кайфиятига заррача таъсир қилгани йўқ.

Финал ўйини якунлангач мусобақанинг «Энг яхши дарвозабони», «Энг яхши ҳимоячиси», «Энг яхши тўпурари», «Энг яхши ўйинчиси», «Энг яхши ишқибозлар гуруҳи» каби йўналишларда ғолиблар аниқланди ва уларга ҳам эсдалик совғалари топширилди.

Мусобақани кучли учликда якунлаган жамоа аъзоларига медаль, фахрий ёрлиқ ва эсдалик совғалари топширилди. Турнир чемпиони эса махсус кубок билан тақдирланди.