Upper Austria Ladies Linz. Иккинчи ракеткамиз муваффақиятли старт олди

Мамлакатимизнинг иккинчи ракеткаси Мария Тимофеева мусобақанинг саралаш баҳсларида ўз омадини синаб кўрмоқда. Вакиламиз 1/2 финалда рейтингда ўзидан юқорида бораётган, турнирда 8-рақам остида таснифланган россиялик 23 яшар Алина Чараевани мағлубиятга учрата олди.    

Бир соату 53 дақиқа давом этган баҳсда 22 яшар Мария 1/6, 6/3, 6/3 ҳисобида ғалаба қозониб, саралашнинг финал босқичига йўл олди. Иккала теннисчи ҳам 3 тадан эйс зарбасини амалга оширган. Қўшхатолар Тимофеевада кўпроқ бўлди - 5 га 4. Бу теннисчиларнинг ўзаро ўтказган иккинчи учрашуви эди. Ўтган йили сентябрь ойида ўтган илк баҳсда ҳам Мария зафар қучганди. 

Таққослаш учун, Мария Тимофеева айни пайтда WTA рейтингида 153, Алина Чараева 129-ўринни эгаллаб турибди. Бугун теннисчимиз асосий тўрга йўлланма берувчи учрашувда германиялик Тамара Корпатчга қарши кортга чиқади. 30 ёшли Тамара 1/2 финалда ватандоши Жюль Ниемейерни 6/3, 6/2 ҳисобида енгди. Корпатч ҳозирда дунёнинг 109-ракеткаси бўлиб турибди. Тимофеева - Корпатч баҳс бизнинг вақт билан соат 14:00да бошланади.