#уйдақол! #ҳаётгақўшил! #sportchallenge челленжида бу сафар ғолиблар географияси кенгайди

Челленжга 14-17 апрель кунлари оралиғида 1 200дан ортиқ видео келиб тушди. Ўтган сафаргилардан фарқли ўлароқ, бу сафар ғолиблар географияси анча кенгайди. Агар 6-9 апрель кунлари ўтказилган танловда улоқни навоийликлар илиб кетишган бўлса, кейинги сафар пойтахт вакиллари жонбозлик кўрсатишганди.

Бу сафар эса ғолиблар юртимизнинг у четидан тортиб бу четига қадар чўзилди, яъни Андижондан то Қорақалпоғистон Республикасигача бўлган ҳудудни қамраб олди.

Ҳакамлар ҳайъати қарорига кўра #уйдақол! #ҳаётгақўшил! #sportchallenge челленжида 14-17 апрель кунги иштирокчилар орасида ғолиблар қуйидагича кўриниш олди:

1-ўрин: Фарғона вилояти Марғилон шаҳри “Янги боғ” маҳалласида яшовчи Акбаровлар оиласи.

2-ўрин: Андижон вилояти Избоскан тумани Пойтуғ шаҳрида истиқомат қилувчи Ғаниевлар оиласи.

3-ўрин: Қорақалпоғистон Республикаси Мўйноқ туманида яшовчи Руслан Жусиповлар оиласи.

Шунингдек, Ҳакамлар ҳайъати қарорига кўра челленжда қатнашиш орқали ўзига хос матонат кўрсатган паралимпиячи спортчилар – хоразмлик Санжар Оллоберганов ҳамда Қашқадарё вилояти Косон туманида истиқомат қилувчи Исмира Исломова Ўзбекистон Республикаси Жисмоний тарбия ва спорт вазирлиги томонидан махсус совға – пул мукофоти билан тақдирланадиган бўлди.

Азиз юртдошлар, #уйдақол! #ҳаётгақўшил! #sportchallenge челленжи давом этмоқда. Шундай экан, уйингизда қолинг, спорт билан шуғулланинг ва челленжимизда қатнашиб, ғолиб бўлинг!

Жисмоний тарбия ва спорт вазирлиги Матбуот хизмати