#уйдақол! #ҳаётгақўшил! #sportchallenge челленжида илк ғолиблар аниқланди

Ушбу челленжни ташкил этишдан мақсад, юртдошларимиз орасида уй шароитида жисмоний тарбия ва спорт билан фаол шуғулланишни кенг тарғиб этишдан иборат эди. Таъкидлаш жоиз, челленж барчада катта қизиқиш уйғотди. Буни 6 апрелда эълон қилинган акцияда қатнашиш учун шу пайтгача кўплаб видео материаллар келиб тушганидан ҳам билиб олиш қийин эмас. 

Ҳакамлар ҳайъати дастлабки уч кунда челленжга келган 800дан ортиқ видео материаллардан энг муносибларини саралаб олишда қийналишди ҳам. Чунки, кўплаб видеоларда челленж шартларига қатъий амал қилинмаган ёки тасвирлар анча сифатсиз олинган. Қолаверса, видео материалларни тасвирга олишда ҳам креатив ёндашиш деярли кўзга ташланмаган. Шу билан бирга юксак дид билан тайёрланган видеолар ҳам йўқ эмас.

Ҳакамлар ҳайъати қарорига кўра #уйдақол! #ҳаётгақўшил! #sportchallenge челленжининг дастлабки уч кунлик танлови якунига кўра ғолиблар қуйидагича кўриниш олди:

1-ўрин. Дмитрий Хвальчевлар оиласи - Навоий шаҳри.
2-ўрин. Опа-сингиллар Мадина ва Шабнам Норпўлатова.
3-ўрин эса бирйўла икки оила вакилларига насиб этди. Булар навоийлик Рўзиевлар ҳамда андижонлик Шириевлар оиласи.

Челленжни фаол тарғиб қилган Маъсума опа Муҳриддинова ҳам рағбатлантирувчи мукофот билан тақдирланади.

Челленжга 9 апрель куни юборилган қолган видеолар эса танловнинг кейинги кунларида иштирок этади. Яна бир гап, илк уринишда ғолиб бўлолмаган юртдошларимиз яна ўз маҳоратларини синаб кўриши мумкин. Шундай экан, тушкунликка тушмасдан мақсад сари интилишда давом этинг.

Дарвоқе, юртдошларимиз учун #уйдақол! #ҳаётгақўшил! #sportchallenge челленжида қатнашиш қулай бўлиши учун Жисмоний тарбия ва спорт вазирлигининг Фейсбукдаги расмий каналида Уйда қол! Ҳаётга қўшил! саҳифаси, Инстаграм каналида эса #sportchallenge саҳифалари очилди. Энди сиз ўз видеоларингизни ушбу саҳифалар орқали ҳам улашиш имкониятига эга бўлдингиз. Юртдошларимизни ушбу челленжда фаол қатнашишга чорлаймиз.