UzChess Cup. Абдусатторов асосий рақибларидан бирини ютди, Синдаровда ҳам ғалаба, 7-турнинг барча натижалари битта хабарда

Иккинчи бор ташкил этилаётган UzChess Cup турнири Masters, Challengers ва Futures гуруҳларида ўтказилмоқда. Кучлилар жам бўлган Masters гуруҳида россиялик жаҳон чемпиони Ян Непомняший, ҳиндистонлик таниқли гроссмейстерлар Аравиндҳ Читамбарам, Рамешбабу Прагнанандҳа, Аржун Эргаиси, эронлик Парҳам Мақсудлу, венгриялик Ричард Раппорт, ўзимизнинг гроссмейстерлар Нодирбек Абдусатторов, Жавоҳир Синдаров, Нодирбек Якуббоев ва Шамсиддин Воҳидов ўзаро баҳс олиб боряпти. 

FIDE Circiut учун қимматли рейтинг очколари ўйналаётган ушбу халқаро турнирнинг 7-турида Нодирбек Абдусатторов оқ доналарда асосий рақибларидан бири, эронлик гроссмейстер Парҳам Мақсудлуни мағлуб этишни уддалади. Жавоҳир Синдаров ҳам оқ доналарда ўйнаб, ҳиндистонлик Читҳамбарам Аравиндҳни мағлубиятга учратди. 

Жаҳон чемпиони Ян Непомняший ҳиндистонлик Рамешбабу Праггнанандҳа билан дуранг қайд этди. Нодирбек Абдусатторовга ушбу турнирдаги ягона мағлубиятни тақдим этган гроссмейстеримиз Нодирбек Якуббоев ўзбек дербисида Шамсиддин Воҳидов билан муросага келди. Ҳиндистонлик машҳур гроссмейстер, дунё рейтингида 5-ўринни эгаллаб турган Аржун Эригаиси венгриялик Ричард Раппорт билан дурангга имзо чекди. 

Challengers гуруҳининг 7-турида грециялик пешқадам Николас Теодороу озарбайжонлик Нижат Абасов билан дурангга рози бўлди. Муҳиддин Мадаминов оқ доналарда америкалик Эндрю Ҳонгни мағлубиятга учрата олди. Гулруҳбегим Тоҳиржонова Виталий Сивук билан муросага келди. Муҳаммадзоҳид Суяров ўзбек дербисида гроссмейстер Жаҳонгир Воҳидовни таслим этди. 

Futures гуруҳининг ортда қолган 7-турида пешқадам Ортиқ Ниғматов кутилмаганда даниялик Борис Чаталбашевга имкониятни бой бериб қўйди. Саидакбар Сайдалиев қора доналарда туркманистонлик гроссмейстер Сапармират Атабаев билан дуранг ўйнади. Яна бир ўзбек дербисида гроссмейстеримиз Абдималик Абдисалимов Ҳумоюн Бегмуратовдан устун келди.