24 июн 12:02
Янгиликлар

Шахмат

UzChess Cup. Абдусатторов ва Синдаровда ғалаба, 5-турнинг барча натижалари битта хабарда

Халқаро шахмат академиясида дунё шахмат юлдузларини ўзида жамлаган, мукофот жамғармаси 105 000 АҚШ долларидан иборат нуфузли турнирда 5-тур ортда қолди.

Иккинчи бор ташкил этилаётган UzChess Cup турнири Masters, Challengers ва Futures гуруҳларида ўтказилмоқда. Кучлилар жам бўлган Masters гуруҳида россиялик жаҳон чемпиони Ян Непомняший, ҳиндистонлик таниқли гроссмейстерлар Аравиндҳ Читамбарам, Рамешбабу Прагнанандҳа, Аржун Эргаиси, эронлик Парҳам Мақсудлу, венгриялик Ричард Раппорт, ўзимизнинг гроссмейстерлар Нодирбек Абдусатторов, Жавоҳир Синдаров, Нодирбек Якуббоев ва Шамсиддин Воҳидов ўзаро баҳс олиб боряпти.

FIDE Circiut учун қимматли рейтинг очколари ўйналаётган ушбу халқаро турнирнинг 5-турида Нодирбек Абдусатторов ҳиндистонлик Читҳамбарам Аравиндҳни мағлубиятга учратди. Бу мағлубият сабаб Аравиндҳ live рейтингида 20-ўринга тушиб кетди. Нодирбек эса аксинча, амалдаги жаҳон чемпиони Гукеш Доммараджуни ортда қолдириб, 6-ўринга кўтарилиб олди.

Ўтган турдаги аламли мағлубиятдан кейин Жавоҳир Синдаров бу сафар венгриялик Ричард Раппортдан устун келди. Раппорд 3-турда Нодирбек Абдусатторовга ҳам ютқазганди. Эронлик Парҳам Мақсудлу пешқадамлардан бири Праггнанандҳаага қарши учрашувдаги муқаррар мағлубиятни ғалабага айлантира олди.

Жаҳон чемпиони Ян Непомняший учун Тошкент турнири омадсиз келмоқда. Бу сафар у гроссмейстеримиз Нодирбек Якуббоев билан дуранг ўйнаб, қимматли очко йўқотди. Яна бир омадсиз иштирокчи Шамсиддин Воҳидов ҳиндистонлик машҳур гроссмейстер, дунё рейтингида 5-ўринни эгаллаб турган Аржун Эригаисига ютқазиб қўйди.

Қизиғи, турнирнинг Challengers гуруҳидаги 5-турнинг барча учрашувлари дуранг натижа билан якунланди. Гулруҳбегим Тоҳиржонова оқ доналарда пешқадам Николас Теодороудан очко тортиб олди. Муҳиддин Мадаминов ва Муҳаммадзоҳид Суяров ўртасидаги ўзбек дербисида ҳам муроса йўли танланди. Жаҳонгир Воҳидов хитойлик Ма Кун билан дуранг қайд этди.

Futures гуруҳининг 4-турида Саидакбар Сайдалиев қора доналарда Клементи Сичёвдан енгилди. Ҳумоюн Бегмуратов туркманистонлик гроссмейстер Сапармират Атабаев билан дуранг ўйнади. Гроссмейстеримиз Ортиқ Ниғматов ўзбек дербисида Абдималик Абдисалимовга ютқазиб қўйганига қарамай, гуруҳ пешқадамлигини ўзида сақлаб қолди.