UzChess Cup III. Нодирбекларда аламли мағлубият. Бугун Мадаминов ёки Воҳидов чемпион бўлиши мумкин

Учинчи бор ташкил этилаётган UzChess Cup III мусобақаси “Masters”, “Challengers” ва “Futures” гуруҳларида ўтказилмоқда. Бош соврин учун дунёнинг кўзга кўринган гроссмейстерлари баҳс олиб боряпти. 

Тўққиз турдан иборат классик шахмат мусобақасида кеча 8-тур партиялари ўтказилди. Мусобақа кашфиётига айланиб улгурган Муҳиддин Мадаминов ҳиндистонлик гроссмейстер Аржун Эригаисига қарши кечган учрашувда ғалабани қўлдан чиқарди ва дуранг натижа билан кифояланди. 

Афсуски, 8-турда икки Нодирбек мағлубият аламини тотиб кўрди. Абдусатторов қўпол хатоси эвазига аутсайдер грециялик Николас Теодоруга ютқазиб қўйди. Якуббоев эса озарбайжонлик Шахрияр Мамедьяровдан енгилди. Шамсиддин Воҳидов ҳиндистонлик гроссмейстер Видит Сантош Гужратҳи билан муросага келди. Россиялик Ян Непомняший оқ доналарда америкалик Ҳанс Мок Ниеманндан устун келди. 

Саккизинчи турдан кейин турнир жадвалида Шамсиддин Воҳидов ва Муҳиддин Мадаминов 5 очкодан жамғариб, қўшҳокимни давом эттиришяпти. Шахрияр Мамедьяров ва Ян Непомняший кечаги муҳим ғалабалари эвазига ўз очколарини 4,5 тага етказиб, Топ-4`га кириб олди. Нодирбек Абдусатторов 4 очко 5-ўринга тушди. Аржун Эригаиси ҳисобида ҳам 4 очко бор. Нодирбек Якуббоев ва Ҳанс Ниеманн 3,5 очко билан еттинчи ҳамда саккизинчи поғоналарни банд этган. Видит Сантош ва Николас Теодору 3 очко билан аутсайдер мақомида бўлиб турибди. 

Бугун турнирда сўнгги 9-тур учрашувлари ўтказилади ҳамда барча уч гуруҳда ғолиб ва совриндорлар маълум бўлади. Бизни ажойиб ўзбек дербиси кутиб турибди - Нодирбек Абдусатторов Шамсиддин Воҳидовга қарши! Нодирбек Шамсиддинни чемпионликдан маҳрум қилиши мумкин. Муҳиддин Мадаминовда ҳам чемпион бўлиш учун яхшигина имконият бор - у бугун қора доналарда Ҳанс Мок Ниеманнга қарши баҳс олиб боради. Сўнгги 9-тур бугун соат 11:30да бошланади.

Маълумот учун, "Masters" турнири чемпиони 20 000, “Challengers” гуруҳи ғолиби 6 000, “Futures”да бош совринга эга чиққан шахматчи эса 4 000 АҚШ доллари миқдорида мукофот пулини қўлга киритади. "Masters" турнирида иккинчи ўрин эгаси 15 000, совринли учинчи поғонадан жой олган шахматчи 10 000 доллар билан тақдирланади.