UzChess Cup III. Шов-шув кўтарган Мадаминовда кетма-кет иккинчи мағлубият, Воҳидов пешқадам!

Учинчи бор ташкил этилаётган UzChess Cup III мусобақаси “Masters”, “Challengers” ва “Futures” гуруҳларида ўтказилмоқда. Бош соврин учун дунёнинг кўзга кўринган гроссмейстерлари баҳс олиб боряпти. 

Тўққиз турдан иборат классик шахмат мусобақасининг дастлабки икки турида номдор рақибларини мағлуб этиб, катта шов-шув кўтарган Муҳиддин Мадаминов кетма-кет иккинчи мағлубиятини қабул қилиб олди. 3-турда яна бир гроссмейтеримиз Шамсиддин Воҳидовга ютқазган Мадаминов 4-турда Нодирбек Якуббоевга ҳам ютқазди. 

Нодирбек Абдусатторов муқаррар мағлубиятга келиб қолган партияни қутқариб қолди, у россиялик Ян Непомняший билан дурангга эриша олди. Қаторасига иккинчи ғалабасини қўлга киритган Шамсиддин Воҳидов қўшимча кўрсаткичларга кўра пешқадамга айланди. У қора доналарда ўйнаганига қарамай, грециялик гроссмейстер Николас Теодоруни мағлубиятга учратди. 

Блиц бўйича жаҳон чемпиони, бир пайтлар дунё рейтингида иккинчи ўринни эгаллаган озарбайжонлик Шахрияр Мамедьяров қора доналарда америкалик Ҳанс Мок Ниеманн билан муросага келди. Ҳиндистонлик Видит Сантош Гужратҳи ҳам қора доналарда ватандоши Аржун Эргаиси билан дуранг ўйнади. 

Тўртинчи турдан кейин Муҳиддин Мадаминов 1-ўриндан 6-поғонага тушиб кетди. Шамсиддин Воҳидов 2,5 очко билан биринчи ўринга кўтарилиб олди. Аржун Эригаиси ва Нодирбек Абдусатторов ҳисобида ҳам 2,5 очко бор. Улар мос равишда иккинчи ва учинчи ўринни банд этишган. Нодирбек Якуббоев, Ҳанс Ниеманн, Муҳиддин Мадаминов, Шахрияр Мамедьяров ва Ян Непомняший ҳисобида 2 очкодан бор. Николас Теодору 1,5 очко билан 9-поғонадан жой олган бўлса, Видит Сантош 1 очко жамғарган ҳолда сўнгги ўринни банд этган. 

Бугун 5-турда Шамсиддин Воҳидов оқ доналарда Ян Непомняший синовидан ўтади. Нодирбек Абдусатторов оқ доналарда Ардун Эригаисига қарши баҳс олиб боради.  Муҳиддин Мадаминов қора доналарда Шахрияр Мамедьяров, Нодирбек Якуббоев Николас Теодору билан ҳисоб-китоб қилади.