UzChess Cup. Ўзбек "Классико"си ҳамда 2-турнинг барча гуруҳларидаги натижалар битта хабарда + ФОТО

Иккинчи бор ташкил этилаётган UzChess Cup турнири Masters, Challengers ва Futures гуруҳларида ўтказилмоқда. 

Кучлилар жам бўлган Masters гуруҳида россиялик жаҳон чемпиони Ян Непомняший, ҳиндистонлик таниқли гроссмейстерлар Аравиндҳ Читамбарам, Рамешбабу Прагнанандҳа, Аржун Эргаиси, эронлик Парҳам Мақсудлу, ўзимизнинг гроссмейстерлар Нодирбек Абдусатторов, Жавоҳир Синдаров, Нодирбек Якуббоев ва Шамсиддин Воҳидов ўзаро баҳс олиб боряпти.

FIDE Circiut учун қимматли рейтинг очколари ўйналаётган ушбу халқаро турнирнинг 2-турида Нодирбек Абдусатторов қора доналарда Жавоҳир Синдаровга қарши баҳс олиб борди. Ўзига хос ўзбек классикосида томонлар дурангга рози бўлишди. Нодирбек Якуббоев қора доналарда ўйнаганига қарамай, ҳиндистонлик гроссмейстер Аравиндҳ Читамбарамни мағлуб этишни уддалади. 

Шамсиддин Воҳидов кетма-кет иккинчи мағлубиятини қабул қилиб олди. Бу сафар ёш гроссмейстеримиз ҳиндистонлик Рамешбабу Прагнанандҳага ютқазди. Илк турда Жавоҳир Синдаровга мағлуб бўлган жаҳон чемпиони Ян Непомняший қора доналарда Ричард Раппорт билан муросага келди. Аржун Эргаиси эронлик Парҳам Мақсудлу билан дуранг ўйнади. 

Турнирнинг Challengers гуруҳида иштирок этаётган Гулруҳбегим Тоҳиржонова қора доналарда озарбайжонлик таниқли шахматчи Нижат Абасовга имкониятни бой берди. Жаҳонгир Воҳидов бу турда мағлубият аламини тотиб кўрди. Гроссмейстеримиз Муҳиддин Мадаминов украиналик афсона Василий Иванчук билан муроса йўлини танлади. Муҳиддин 1-турда Нижат Абасовдан устун келганди. Ёш шахматчимиз Муҳаммадзоҳид Суяров грециялик Николас Теодороуга ютқазди. 

Futures гуруҳининг 2-турида ҳам ўзбек дербиси кузатилди. Саидакбар Сайдалиев ва Абдималик Абдисалимов партиясида шахматчиларимиз очколарни бўлишиб олишди. Гроссмейстеримиз Ортиқ Ниғматов Клементи Сичёвни таслим эта олди. Ҳумоюн Бегмуратов Евгений Алексеевга мағлуб бўлди.