"Вазият ёқимсиз" — Кафельников Кудерметованинг фуқаролигини ўзгартириши ҳақида

Жаҳоннинг 104-ракеткаси, 22 ёшли Полина Кудерметова спорт фуқаролигини ўзгартириб, Ўзбекистон шарафини ҳимоя қила бошлаганди. Жаҳон рейтингида 50-ўринни эгаллаб турган 24 ёшли Анастасия Потапова эса Австрия вариантини танлаган эди. 

"Бунга аралашишнинг иложи йўқ - бу фақат спортчиларнинг шахсий қарори. Вазият ёқимсиз, лекин уни ўзгартириб бўлмайди. Биз бунга тайёр эдик. Шу билан бирга, очиқ айтиш керакки, гап терма жамоа етакчилари ҳақида кетмаяпти. Потапова ҳам, Полина Кудерметова ҳам ҳозирги шароитда Олимпиада таркибига кирмаган бўларди - улар Россия тўртлигига кирмайди. Фуқароликни ўзгартириш уларга Лос-Анжелес-2028 ўйинларида иштирок этиш учун курашиш имкониятини беради. Бу уларнинг танлови ва мен буни "яхши" ёки "ёмон" деб баҳоламайман", - деди Кафельников CLAY нашрига берган интервьюсида.

Эслатиб ўтамиз, Анастасия Потапова шу йилнинг 4 декабрь куни Австрия терма жамоасида ўйнашга қарор қилганини эълон қилди. Полина Кудерметова эса 14 декабрь куни Ўзбекистон "фуқароси"га айланди.