Владимир Кличко «ҳар томондан ҳужум ва босқинга учраган мамлакатнинг пойтахтидан» ёзади: «Бу Украина уруши эмас. Бу Путиннинг уруши»

Украинлик таниқли спортчилар ўз юртларида содир бўлаётган урушдан барча каби қаттиқ ҳавотирда. Боксчи Владимир Кличко ижтимоий тармоқда Россиянинг Украинга бостириб киргани ва унинг оқибатлари ҳақида ёзди.

«Мен сизга Киевдан, уруш бўлаётган, ҳар томондан ҳужум ва босқинга учраган мамлакатнинг пойтахтидан ёзяпман. Бу "Украина уруши" эмас, бу Путиннинг уруши. Бир неча ой давомида тузилган режани йўлга қўйиш учун сўнгги бир неча ҳафта сокинликлари ортида пухта тайёргарлик яширинган эди.  Сохта дипломатик декларациялар энди йўқ. Энди Россия президенти соф большевик анъаналарида уруш риторикасидан фойдаланмоқда ва чегараларни қайта тақсимлашни оқлаш учун тарихни қайта ёзмоқда. У Украина давлатини ва унинг халқининг суверенитетини йўқ қилмоқчи эканлигини очиқ-ойдин билдиради. Сўзлардан кейин ракеталар ва танклар келади. Бизнинг бошимизга вайронагарчилик ва ўлим келади. Якунда, кўз ёшлари билан қон аралашади.

Биз ўзимиз ва фарзандларимиз келажаги ҳақида хулоса чиқариш учун жасоратли бўлишимиз керак. Бу халқаро ҳуқуқнинг очиқдан-очиқ бузилишидир. Ва агар диққат билан тингласангиз, бу уруш Европа ҳақида ҳам гапиради.

Путин бутун Европа бўйлаб геосиёсий мувозанатни шубҳа остига қўймоқчи, у славян халқлари қаерда яшамасин, уларнинг ҳимоячиси бўлишни орзу қилади ва ҳалокатини ҳеч қачон қабул қила олмаган, аллақачон яксон бўлган империяни тикламоқчи. У бизнинг қитъамизга бузилган-ҳаёлий улуғвор ўтмишнинг кўзойнаклари орқали нигоҳ ташлайди. Шунга қарамай, бу мегаломания жуда аниқ таъсирга эга. Европа турмуш тарзи таҳдид остида, халқларнинг ўз қарорларини қабул қилиш эркинлиги ва демократия таҳдид остида», - деб ёзиб қолдирди, Владимир Кличко Инстаграм саҳифасида.