Воҳада энг кучли бадминтончилар сараланди + ФОТО

Ўзбекистон Республикаси Президентининг “Жисмоний тарбия ва оммавий спортни янада ривожлантириш чора-тадбирлари тўғрисида”ги қарори ижросини таъминлаш мақсадида Урганч шаҳридаги Спорт ўйинлари ва енгил атлетикага ихтисослаштирилган болалар-ўсмирлар спорт мактабининг “Бадминтон маркази”да 2009-2010 йилларда туғилган ўғил ва қизлар ҳамда катталар ўртасида Хоразм вилояти биринчилиги ўтказилди.

Мусобақада Урганч шаҳри, Боғот, Ҳазорасп, Хонқа, Хива, Янгиариқ, Қўшкўпир, Урганч ва Янгибозор туманларидан келган 100 нафарга яқин бадминтон устаси яккалик баҳсларда куч синашди.  

Қуйидаги қатнашчилар ўзларининг ёш тоифалари бўйича вилоят чемпионлигини қўлга киритишди:

2009-2010 йилларда туғилган  ўғиллар: 1-ўрин. Раҳматулла Раҳматуллаев (СЎЕАИБЎСМ).

2009-2010 йилларда туғилган  қизлар: 1-ўрин. Дилнура Қуронбоева (Хонқа тумани).

Эркаклар: 1-ўрин. Ғаффор Жабборов (СЎЕАИБЎСМ).

Аёллар: 1-ўрин. Азиза Машарипова (СЎЕАИБЎСМ).

Умумжамоа ҳисобида  биринчи ўриннни Спорт ўйинлари ва енгил атлетикага ихтисослаштирилган болалар-ўсмирлар спорт мактаби жамоаси эгаллади. Иккинчи ўриндан Урганч олимпия ва миллий спорт турлари бўйича давлат ихтисослаштирилган мактаб-интернати спортчилари жой олган бўлса, фахрли учинчи ўрин Урганч давлат университети бадминтончиларига насиб этди.

Биринчиликнинг ёпилиш маросимида қатнашган Хоразм вилояти Жисмоний тарбия ва спорт бошқармаси бошлиғи Нодира Жуманиязова, Ўзбекистон касаба уюшмалари жисмоний тарбия ва спорт бошқармасининг Хоразм вилояти вакили Шокир Мадаминов, Ўзбекистон бадминтон федерацияси вилоят бўлими ижрочи директори Собиржон Асқаров, СЎЕАИБЎСМ директори Жамоладдин Абдуллаевлар ғолиб ва совриндорларни қутлашди.  

Икром ХУДОЙБЕРГАНОВ, Урганч шаҳридан