Волков АҚШга боради, 21 июнь кунги жангнинг расмий постери ҳам тайёр + ФОТО

АҚШнинг Невада штати Лас-Вегас шаҳридаги UFC APEX аренаси мезбонлик қилувчи ушбу оқшомнинг марказий жанги оғир вазн тоифаси вакиллари - россиялик Александр Волков ҳамда америкалик Кёртис Блейдс ўртасида бўлиб ўтади. 

Аввалроқ UFC президенти Дэна Уайт россиялик жангчиларни АҚШга олиб келиш борасида муаммога дуч келаётганини айтган эди. Кеча эса Россия ҳукумати мамлакат фуқароларини фақат иш юзасидан хорижга чиқишларига рухсат берди.

"Ҳукуматнинг махсус Фармойиши имзоланди, унга кўра Россия фуқароларига иш ва ўқиш юзасидан ҳамда хорижда яшаётган бемор қариндошларининг ҳолидан хабар олишлари учун рухсат берилди", — дейди Россия Федерацияси бош вазири Михаил Мишустин.

Маълумот учун, Александр Волков сўнгги жангини ўтган йилнинг ноябрь ойида Москвадаги UFC турнирида ўтказган бўлиб, ўшанда Грег Хардини мағлубиятга учратган эди. У айни пайтда рейтингда 7-ўринни эгаллаб турибди. Блейдс эса сўнгги жангида Жуниор дос Сантосни нокаутга учратган ва ўша ғалабадан сўнг рейтингда 3-ўринга кўтарилиб олганди. 

Александр Волков ҳисобида аралаш яккакурашлар бўйича 38 та жанг бўлиб, уларнинг 31 тасида ғалаба қозонган. Ҳисобида 7 та мағлубият бор. Блейдс эса 15 та жангининг 13 тасида зафар қучган. Икки бор мағлубият аламини тотиб кўрган.