06 сен 18:30
Янгиликлар

Бокс/ММА

WBA: Ҳасанбой Дўсматов чемпионлик жангига яқин + ФОТО

WBA ташкилоти ижтимоий тармоқдардаги саҳифалари орқали биринчи ўта енгил вазнда ўзбекистонлик профессионал боксчи Ҳасанбой Дўсматов (5-0-0, 5 КО) ҳақида пост эълон қилди.

Постда ташкилот боксчимизнинг тез орада чемпионлик жанги учун рингга чиқишини маълум қилган:

"Профессионал боксда Ҳасанбой Дўсматов 2019-2022 йиллар давомида бешта жанг ўтказган ва уларнинг барчасида муддатидан олдин ғалаба қозонган. У профессионал боксда муваффақият қозониш услуби ҳамда жаҳон чемпионлиги йўлида жанг қилиш учун зарур бўлган фазилатларга эга эканини кўрсатди.

Дўсматов ўзида кўп фазилатларни мужассам этган, у томоша қилиш учун қизиқарли жангчи. Ҳасанбой Дўсматовга эътибор қаратиш керак, чунки у тез орада чемпионлик жанги учун рингга чиқиши мумкин", - дейилади WBA хабарида.

Эслатиб ўтамиз, Ҳасанбой Дўсматов проф боксдаги сўнгги жангини ўтган йилнинг май ойида мексикалик Мойзес Каирога қарши ўтказиб, муддатидан олдин ғалаба қозонган эди.

Маълумот учун, биринчи ўта енгил вазнда амалдаги WBA чемпиони япониялик боксчи Кенширо Теражи (21-1-0) ҳисобланади.