WBC. Рейтингдаги 7 нафар ўзбек боксчиси қандай ўринда?

WBC бошқа ташкилотлардан фарқли равишда кучли 15 боксчини эмас, 40 нафар чарм қўлқоп устаси рейтингини эълон қилади. 

Куни кеча эълон қилинган рейтингдан 7 нафар ўзбекистонлик боксчи ўрин олган. 

Биринчи ярим ўрта вазн тоифасида (-63,50 кг) фаолиятини давом эттираётган Шоҳжаҳон Эргашев WBC рейтингида 30-поғонадан жой олган. Яна бир чарм қўлқоп устамиз Анвар Туропов эса 40-поғонага жойлашган. 

Яримўрта вазн тоифасида жангларда иштирок этадиган Қудратилло Абдуқаҳҳоров (-66,67 кг) саккизинчи ўринга жойлашган.

Биринчи ўрта вазн тоифасида (-69,8 кг) WBA Intercontinental чемпионлик камари соҳиби бўлиб турган чарм қўлқоп устамиз Исроил Мадримов янгилаган рейтингнинг 27-поғонасидан жой олган. 

Иккинчи ўрта вазн тоифасидаги Азизбек Абдуғофуров (-76,2 кг) эса аввалги ойдаги каби иккинчи ўринда қолган. Эслатиб ўтамиз, Азизбек айни пайтда WBC Silver камари соҳиби ҳисобланади. Мазкур вазнда шунингдек Бектемир Мелиқўзиев 38-поғонага жойлашган.

Супероғир вазн тоифасида мағлубиятсиз одимлаётган чарм қўлқоп устамиз Баҳодир Жалолов янгиланган WBC рейтингида 39-поғонани эгаллаб турибди.