WR Chess жаҳон чемпиони унвонини ҳимоя қилди, Ўзбекистон қандай натижа қайд этди?

Умумий мукофот жамғармаси ярим миллион еврони ташкил қилган ва дунёнинг 55 жамоаси иштирок этган ушбу нуфузли мусобақада Ўзбекистон терма жамоаси ҳам кучли таркибда юртимиз шарафини ҳимоя қилди. Ҳамюртларимиз рапид баҳсларида қўшимча кўрсаткичларга кўрагина 4-ўринни эгаллаганди. 

Кеча якунларган блиц, яъни тезкор шахмат йўналишида ҳам шахматчиларимиз 4-ўринни банд этишди. Ўзбекистон терма жамоаси саралаш босқичидаги 12 та учрашувнинг барида ғалаба қозониб, 24 очко билан С гуруҳи ғолиби сифатида плей-оффга йўл олганди. 1/8 финалда D гуруҳида 4-ўринни эгаллаган Қозоғистоннинг Barys.kz жамоаси икки ўйин натижасига кўра таслим этилди. Чорак финалда Ниҳал Сарин бошчилгидаги Исроилнинг Ashdod Elit Chess Club жамоасидан устун (3:3, 5:1) келдик. 

Афсуски, 1/2 финалда устунликка эга бўлсак-да, Александр Гришук бошчилигидаги Қозоғистонниг KazChess жамоасига ютқазиб қўйдик. Биринчи баҳсда 3:3 ҳисобидаги дуранг қайд этилди. Иккинчи баҳсда 4:2 ҳисобида қўшниларимиз зафар қучиб, финалга йўл олишди. Учинчи ўрин учун кечган учрашувда эса Левон Аронян, Аниш Гири, Видит Гужратҳи, амалдаги чемпион Володар Мурзин сингари таниқли гроссмейстерлар жам бўлган Hexamind жамоасига ҳар икки ўйинда ҳам 2,5:3,5 ҳисобида ютқазиб, 4-ўрин билан кифояландик. 

Шу тариқа, Ўзбекистон терма жамоаси ҳар икки йўналишдаги жаҳон чемпионатини 4-ўринда якунлади. Рапид баҳсларидан 30 000, блиц йўналишидаги иштирокимиздан эса 50 000 евро, умумий 80 000 евро мукофот пули ишлаб олдик. Финалда KazChess жамоасини мағлубиятга учратган WR Chess Team жамоаси блиц бўйича жаҳон чемпионлик унвонини ҳимоя қилди. 

Ғолиб ва совриндорлар ҳамда уларнинг таркиби:

Чемпион WR Chess Team — Непомнящий, Накамура, Фирузджа, Со, Вашье-Лаграв, Дуда, Костенюк, Хоу Ифань, Розенштейн 

Кумуш медаль KazChess — Гришук, Раппорт, Есипенко, Мақсудлу, Садвакасов, Ансат, Камалиденова, Айтен

Бронза медаль Hexamind Chess Team — Аронян, Мурзин, Домингес, Гири, Видит, Дешмух, Панарин, Мурадян