Халқаро Пресс клуб Кураш спортини янада оммалаштиришда ҳамкорлик қилади

Жорий йилда Халқаро Кураш ассоциацияси ва қитъавий конфедерациялар тақвим режасидан 50 дан ошиқ нуфузли тадбирлар ўрин олган. Март ойида Кураш ватани – Ўзбекистонда катталар ва ёшлар ўртасида Осиё чемпионати бўлиб ўтса, сентябрь ойида Хитойнинг Гуанжоу шаҳри Ёзги Осиё ўйинларига мезбонлик қилади. 

Ноябрнинг якунларида эса Ҳиндистонда Кураш бўйича катталар ўртасида Жаҳон чемпионлари номи аниқланади. Шунингдек, жорий йилда юртимизда ва Кўҳна қитъа Европада бир неча бора Ўзбекистон Республикаси Президенти соврини учун халқаро турнирлар, Кураш мураббийлари ва ҳакамларининг халқаро семинарлари ташкил этилади. 

Кеча Халқаро Кураш ассоциациясида бўлиб ўтган йиғилишда ҳам мазкур мусобақаларни энг юқори даражада ташкил этиш, севимли спортимизни халқаро майдонда янада ривожлантириш каби масалалар муҳокама қилинди. 

Йиғилишда Халқаро Кураш ассоциацияси ва унинг таркибидаги Осиё-Океания Кураш конфедерацияси, Халқаро кураш институти, Ўзбекистон Кураш федерацияси раҳбарлари, Халқаро пресс клуб ва ОАВ вакиллари иштирок этишди. 

Дарҳақиқат, Кураш асрлар давомида Ўзбек халқининг энг оммавий ва севимли миллий ўйинлари қаторида эъзозлаб келинган. Кураш- якка курашнинг қадимий тури бўлиб, тарихий маълумотларга кўра унинг ёши уч минг йилликдан ортиққа бориб тақалади. 

Кураш – ўзбекча сўз бўлиб, ғалабага ҳалол йўл деган маънони билдиради. Бугунги кунда Халқаро Кураш ассоциациясии таркибида 130 дан зиёд давалатлар миллий федерациялари фаолият юритади. 

Ўзбекистон ҳукуматининг қўллаб-қувватлаши ва Ассоциация раҳбарияти саъй-ҳаракатлари билан Кураш спорти Осиё ўйинларининг барча Дастурларидан расман ўрин эгаллаган. Ўзбекистон Республикаси Президентининг 2020 йил 4 ноябрь куни “Кураш миллий спорт турини ривожлантириш ва унинг халқаро нуфузини ошириш чора-тадбирлари тўғрисида”ги ПҚ-4881-сон қарори қабул қилинди. 

Мазкур қарор Кураш спортининг ривожи йўлидаги янги даврни бошлаб берди. Қарор асосида Ассоциация ва унинг таркибидаги миллий федерацияларни қўллаб-қувватлаш, профессионал курашчи ва мутахассисларни тайёрлаш, Кураш спортини янада оммалаштириш, республика ва халқаро медиа майдонда кенг тарғиб қилиш, келажакда Курашни Олимпияда ўйинлари Дустурига киритиш борасида манзилли чора-тадбирлар белгилаб берилган. 

Йиғилиш давомида мазкур ишларни ташкил этишда ўзаро ҳамкорлик, бир жамоа сифатида фаолият юритиш муҳимлиги алоҳида таъкидланди. Халқаро Пресс клуб томонидан Кураш спортини кенг тарғиб қилиш, оммалаштириш бўйича Осиё-Океания Кураш конфедерацияси ва Ўзбекистон Кураш федерациялари билан ҳамкорлик меморандуми имзоланди.