Хамзат Чимаев илк чемпионлик ҳимоя жанги учун рақиб танлади

Хамзат рақиб сифатида нидерландиялик Ренье де Риддерни танлади. Ренье ўрта вазн тоифаси рейтингида бешинчи ўринни эгаллаб турибди. 

"РДР", – дея рақиб исм-шарифининг бош ҳафрларини ўзининг ижтимоий тармоқдаги саҳифасида ёзиб қолдирган Чимаев. 

Аввалроқ, Ренье де Риддер 25 октябрь куни БАА пойтахти Абу-Даби шаҳрида ўтказиладиган UFC 321 турнирида янги чемпионга қарши октагонга чиқиш истагида "вызов" ташлаган эди. 

"Мен 100 фоизга Абу-Дабида жанг қилишга тайёрман. Ишончим комил, у учун яхшигина бош оғриғи бўламан. Албатта, ўзим учун ҳам жангнинг қандай ўтиши қизиқ туюляпти. Агар мени партерга туширса – бу ажойиб иш бўларди. Мабодо мен уни партерга тушира олсам, бу ҳам яхши янгилик. Тик турган ҳолда жанг ўтказсак ҳам бу яхшилик аломати. Ўйлайманки, бу ўзимни кўрсатиш учун ажойиб имконият ва ундан максимал даражада фойдаланиб қоламан", – деганди "Нидерландиялик рицарь" Submission Radio радиосига берган интервьюсида.

Маълумот учун, Ренье де Риддер шу йилнинг июль ойида UFC`даги кетма-кет тўртинчи ғалабасини қўлга киритганди. У муросасиз жангда тажрибали Роберт Уиттакерни ҳакамларнинг айри қарори билан мағлубиятга учратган эди.