Ханчжоу-2022, Париж-2024: Спорт курашларида режалар муҳокама қилинди

Ўзбекистон Миллий олимпия қўмитаси ҳамда Жисмоний тарбия ва спорт вазирлиги билан ҳамкорликда ташкил этилаётган мазкур тадбир доирасида бугун Ўзбекистон Спорт курашлари ассоциациясининг тайёргарлик режаси муҳокама қилинди.

ZOOM платформасида ўтказилган тадбирда Ўзбекистон Миллий олимпия қўмитаси президенти Рустам Шоабдураҳмонов, МОҚ Бош котиби Ойбек Касимов ва бошқа мутасаддилар иштирок этди. Тақдимотни Ассоциация бош котиби Шуҳрат Мамадалиев олиб борди.

"Бутун дунёга катта ташвиш келтирган коронавирус пандемияси спортни ҳам четлаб ўтгани йўқ. Бунинг натижасида барча мусобақалар, шу жумладан Токио-2020 Олимпиадаси ҳам бир йилга кечиктирилди. Шунга қарамай, спорт кураши вакилларимиз бир зумга ҳам тайёргарликни сусайтиришмади. Уй шароитида бўлса-да, мураббийлар томонидан ишлаб чиқилган режа асосида машғулотларни олиб боришди. Карантин қоидалари юмшатилганидан кейин эса бошқа спорт турлари қатори курашчиларимиз ҳам машғулот залларига қайтишди. Бугунги кунда ўсмир ва ёшларимиз Тошкент вилоятининнг Чимён тоғларида, катталар терма жамоамиз эса пойтахтда ўқув-машғулот йиғинига киришган. Ҳозир бор эътиборимиз Олимпия ўйинларининг лицензион мусобақаларига қаратилган. Барча вазн тоифаларида йўлланмаларни қўлга киритишимиз шарт. Шунингдек, параллел равишда Ханчжоу-2022 Осиё ўйинлари ва Париж-2024 Олимпиадасига ҳам тайёргарлик кетаяпти. Бизда селекция ишлари натижасида захира кучли шаклланган. Ёшларимизнинг халқаро аренада кўрсатаётган натижаси фикримга исбот бўла олади. Эркин, юнон-рим ва аёллар кураши терма жамоаларимизнинг ички захираси ҳақида илиқ фикр билдира оламан. Ишлашда, янги марразаларни забт этишда давом этамиз", - деди Мамадалиев.

Тадбир якунида МОҚ президенти Рустам Шоабдураҳмонов ва бошқа мутасаддилар тақдимот юзасидан ўз фикр-мулоҳазаларини билдиришди.