Хитойлик курашчи 39 ёшли Магомед Ибрагимовни "нафақа"га кузатиб қўйди

Энг охирги умидимиз Магомед Ибрагимов плей-оффнинг финал беллашувида аламли мағлубиятни қабул қилиб олди.

Ибрагимов аввалига драматик кечган беллашувда македониялик Магомедгаджи Нуровни, кейин молдовалик Раду Лефферни мағлубиятга учратганди. Ҳал қилувчи баҳсда эса хитойлик Авусайман Хабилага ютқазди. Биринчи бўлим ҳамюртимиз бир баллни қўлга киритди. Иккинчи уч дақиқаликда Чин юрти вакили бир очкога эга бўлди. Сўнгги қўлга киритилган балл Хабилага Париж-2024 Олимпиадаси лицензиясини тақдим этди. Мураббийларимиз томонидан сўралган челленж ҳам ёрдам бермади. 

Шу тариқа, Рио-2016 Олимпиадасининг бронза медали совриндори ўзи учун учинчи Олимпиадада иштирок эта олмайдиган бўлди. Ўзбекистон эркин кураш терма жамоасининг уччала вакили ҳам юртимизга лицензиясиз қайтадиган бўлди. Магомед Ибрагимовга кўп йиллик хизмати учун раҳмат айтамиз. Энди ёшларга йўлни бўшатиш керак.