Холифилднинг қулоғи яна хавф остида. Тайсон билан трилогия яқинлашмоқда

Бунинг учун фақат арабларнинг пули керак...

Майк Тайсон ва Эвандер Холифилд ўртасидаги буюк қарама-қаршилик ҳақида ким эшитмаган? Хатто спортдан мутлақо йироқ одамлар ҳам Америкада бир боксчи бошқасининг қулоғини тишлаганини эшитган. Бокс мухлислари Холфилд Тайсонни боши билан йўллаган зарбалар сабаб ғазаблантирганини билишади, бу эса ўз навбатида тишларнинг ишлатилишига олиб келганди. Бироқ, айёрликдан ташқари, Эвандер ажойиб маҳоратга эга эди, бунинг натижасида у Майк билан иккала жангда ҳам ғалаба қозонди. Бу, албатта карьераси бошида бўлгани каби эмас эди.

Рингдаги кескин можаро Тайсон ва Холифилднинг яна кўп йиллар давомида бир-бирлари билан гаплашмаслигига олиб келди. Бироқ, 2009 йилда буюк боксчилар ярашишди ва яқинда Эвандернинг тишланган қулоқлари кўринишидаги каннабис конфетларини ишлаб чиқаришни йўлга қўйишди. Аммо дўстона муносабатлар икки таниқли фахрийнинг учинчи жанг ҳақидаги умидларига тўсқинлик қилмайди. Ундан ташқари, бу жанг кексаликда қўшимча пул топишнинг ажойиб усули.

Бир йил аввал жанг албатта бўлиб ўтадигандек туюларди, аммо молиявий келишмовчиликлар туфайли учрашувни бекор қилишга тўғри келди. Промоутерлар Тайсонни гонорарни ўзлаштирганликда айблашди ва ҳаммаси барбод бўлди. Аммо кечагина Темир Майк Эвандерни мағлуб этишга тайёр эканлигига шаъма қилди: "Мен бу жанг бўлишини хоҳлардим, Саудия Арабистонидагилар ҳам буни исташади. Билмайман... Мени ишонтириш мумкин. Мен баъзи одамлар билан гаплашишим керак. Ростдан ҳам пул  тўлашга тайёр одамларни кўрганимда, бошим яхши ишлай бошлайди".

Бу трилогияни кўплаб бокс мухлислари кўришни хоҳлайди! Зеро, иккала фахрий ҳам яхши спорт формасида: 56 ёшли Тайсон тинимсиз машғулот ўтказмоқда ва бир неча йил олдин Рой Жонс билан муносиб кўргазмали жанг ўтказган, 60 ёшли Холифилд ҳам яқинда рингга чиқди. Фақат ҳозир Эвандер у ерда икки дақиқадан ортиқ тура олмади ва собиқ ММА суперюлдузи Витор Белфортнинг зарбаларидан сўнг нокаутга учради.

Сўнгги натижаларга кўра, Тайсоннинг имкониятлари Холифилдникидан яхшироқ кўринади. Ва умуман олганда, Майк ўзининг потенциал рақибига қараганда тезлик ва рефлексларни кўпроқ сақлаб қолган деган фикр бор. Тайсонда афсонавий трилогияни ғалаба билан якунлаш ва хатто Холифилдни нокаутга учратиш учун ажойиб имконият бор. Бу араб шайхларига боғлиқ, улар фахрийларга катта миқдорда гонорар таклиф қилишлари шарт.