Ядонг - Нурмагомедов жангида кутилмаган нокаут қайд этилди

Оқшомнинг асосий жангида кутилмаган натижа кузатилди. Ўта енгил вазн тоифасида ташкил этилган жангда хитойлик 28 ёшли Сонг Ядонг россиялик 30 яшар Умар Нурмагомедовга қарши октагонга чиқди. Иккинчи раундда ўз ҳамюртлари кўз ўнгида жанг ўтказган Сонг номдор рақибини нокаутга учратди. Бўйин қисмига зарба йўллаши натижасида Умарни мувозанатдан чиқарган Ядонг ҳимоясиз қолган рақибга яна учта зарба берди. Рефери бу вазиятда жангни тўхтатди ва нокаут қайд этди. 

Аслида Нурмагомедов июль ойида UFC Абу-Даби турнирида иштирок этиши керак эди. Аммо рақиби Дэвид Мартинес жароҳат сабаб сафдан чиққани боис UFC Умарнинг жангини Шанхай кардига кўчиришга қарор қилганди.