Янги раис, мураббийлар билан учрашув ва Алишер Авезбаев. Ўзбекистон бокс федерацияси раҳбариятининг Қорақалпоғистонга сафари якунланди

Ушбу сафардан кўзланган асосий мақсад Ўзбекистон бокс федерациясининг Қорақалпоғистон бўлинмасига янги раис тайинлашдан иборат эди. Бўлинмага Бахтиёр Панаев раис этиб тайинлангани ҳақида Ўзбекистон бокс федерациясининг расмий сайти ва ижтимоий тармоқдаги саҳифалари орқали хабар бердик.  

Қорақалпоқ заминига ташриф давомида Сакен Полатов Нокис Олимпия резервлари коллежига ҳам бориб, у ердаги мураббий ва ёш спортчилар билан учрашди. Учрашув давомида Республика бокси ривожига тўсиқ бўлаётган муаммолар ўртага ташланди, мураббийлар олдидан юзага келган муаммолар ҳақида гапириб беришди. 

Раҳбарият бундай муаммолар босқичма-босқич бартараф этилишини, режа асосида Республикада фаолият олиб бораётган шифокорлар, ҳакамлар, мураббийлар малакасини ошириш учун турли семинарлар ташкил этилиши ҳақида сўз борди. 

Шундан сўнг мутасаддилар Қорақалпоғистон бокс маркази барпо этиладиган жойга бориб, ташкилий масалаларни муҳокама қилишди.

Нукус шаҳридаги 2-болалар ва ўсмирлар спорт мактабининг машғулотлар зали ҳам меҳмонларда яхши таассурот қолдирди.

Дарвоқе, мазкур сафар давомида Осиё ўйинларида чемпион бўлган қорақалпоғистонлик боксчи Алишер Авезбаев ҳам ишчи гуруҳ вакилларига ҳамроҳлик қилди. Ўзбекистон бокс федерацияси матбуот хизмати Қорақалпоқ боксининг яқин ўтмишдаги юлдузи, собиқ боксчимиз билан интервью ташкил этди. Яқин кунларда ушбу интервьюни ўқишингиз мумкин бўлади.

Шу тариқа, Ўзбекистон бокс федерацияси вакилларининг Қорақалпоғистон Республикасига қилган сафари ниҳоясига етди.