Янник Синнер vs Карлос Алькарас: 5 млн. доллар учун кечган ATP Якуний турнирида ким чемпион бўлди?

Икки соату 4 дақиқа давом этган финал баҳсида Янник Синнер ўз ватандошлари олқиши кўмагида рейтинг пешқадамини Карлос Алькарасни мағлубиятга учратди - 7/6(4), 7/5. Теннисчиларнинг ўзаро учрашувларида ҳамон Карлос катта фарқ билан олдинда бормоқда - 10:6. 

Финал статистикаси:

Янник Синнер — 8 та эйс, 5 та қўшхато, 2 та брейк

Карлос Алькарас — 5 та эйс, қўшхато йўқ, 1 та брейк

Туриндаги соврин Янник учун мавсумдаги олтинчи, фаолиятидаги 24-титул бўлди. У бу йилги мавсумда Париж, Пекин, Вена, шунингдек, "Катта Дубулға" туркумига кирувчи Уимблдон ва Australian Open турнирларида ҳам бош совринга эга чиққанди.

Янник Синнер Якуний ATP турниридаги чемпионлик унвонини ҳимоя қилиш баробарида 1500 рейтинг очкоси ҳамда 5 миллион 71 минг АҚШ доллари миқдорида мукофот пулини қўлга киритди. Бу ATP тарихидаги рекорд мукофот пули ҳисобланади. Профессионал теннисдаги рекорд аёллар теннисига тегишли. Бир ҳафта аввал қозоғистонлик Елена Рибакина Якуний WTA турниридаги чемпионлиги ортидан 5 млн 235 минг доллар ишлаб олганди. 

Финалчи Карлос Алькарас эса 1000 рейтинг очкоси ҳамда 2 млн 704 минг доллар мукофот пулига эга чиқди.