Японияда икки кун ичида икки боксчи жангдаги жароҳати сабаб вафот этди

Хиромаса Уракава Токиодаги турнирда оғир нокаутга учраганидан бир ҳафта ўтиб вафот этди. Бу ҳақда Бутунжаҳон бокс ташкилоти (WBO) ўз ижтимоий тармоқларида маълум қилди.

Манбага кўра, 2 август куни 28 ёшли спортчи саккизинчи раундда ҳамюрти Ёжи Сайтога нокаут билан ютқазган. Бир кун олдин худди шу турнирда бошқа бир япониялик боксчи - 28 ёшли Сигетоси Котари вафот этганди, у ҳам жангда бош қисмидан оғир жароҳатлар олган эди.

"WBO 2 август куни Токиодаги Коракуэн залида Ёдзи Сайтога қарши жангда олган жароҳатлари туфайли вафот этган япониялик боксчи Хиромаса Уракаванинг вафоти муносабати билан мотам тутади. Бу юракни эзувчи хабар Сигетоси Котари вафот этганидан икки кун ўтиб пайдо бўлди, у худди шу картдаги жангда олган жароҳатлари сабаб вафот этди. Ушбу ўта оғир дамда боксчиларнинг оила аъзолари ва яқинларига бокс жамоатчилиги номидан чуқур ҳамдардлик билдирамиз", - дейилади WBO баёнотида.

Маълумот учун, Хиромаса Уракава фаолияти давомида 14 та жанг ўтказиб, 10 та ғалаба ва 4 та мағлубият қайд этганди. Апрель ойида у айнан Котарини олтинчи раундда нокаутга учратиб, сўнгги ғалабасига эришган эди.