Ярим очко Абдусатторовни кучли учликдан маҳрум қилди. Рапид йўналишида ўзбекистонлик шахматчилар қайд этган натижалар билан танишинг

Эркаклар ўртасида ташкил этилган беллашувлар 13 партиядан иборат бўлди.

Баҳслар якунида норвегиялик амалдаги чемпион Магнус Карлсен 10 очко билан ғолиб бўлди ва ушбу йўналишда беш карра чемпионга айланди. Иккинчи ўрин эса словениялик Владимир Федосеевга (9,5 очко) насиб этди. 9 очко жамғарган Ю Янг Йи қўшимча баллар ҳисобига учинчи ўринни эгаллади.

Ўзбекистон терма жамоасидан 20 нафар шахматчи ушбу баҳсларда иштирок этди.

Энг яхши натижамиз эса етакчи вакилимиз Нодирбек Абдусатторовга тегишли бўлди. У 13 та имкониятдан 9 очко жамғарди. Афсуски, сўнгги баҳдаги дуранг Нодирбекни кучли учликдан маҳрум қилди. Абдусатторов рапид баҳсларини 11-ўринда якунлади.

Тўрт нафар шахматчимиз (Жаҳонгир Воҳидов, Жавоҳир Синдаров, Шамсиддин Воҳидов, Муҳиддин Мадаминов) мусобақани 8 очко билан якунлади. Сўнгги партияда ўзаро рўбарў келган Воҳидов ва Синдаров турнирни 30 ва 38-ўринларда якунлади. Охирги раундда ғалаба қозонган Шамсиддин Воҳидов ва Муҳиддин Мадаминов эса 41 ва 44-ўринларни банд этди.

Халқаро мастер Ортиқ Ниғматов мундиалнинг рапид йўналишида 13 та имкониятдан 7,5 очко жамғарди ва 61-ўринни эгаллади.

Муҳаммадали Абдураҳмонов 6,5 очко билан 97-ўринни банд этди. Муҳаммадзоҳид Суяров ҳамда Акмал Файзуллаев 6 очко, Абдималик Абдисалимов ва Ҳумоюн Бегмуратов 5,5 очко, қолган шахматчиларимиз эса бундан пастроқ натижани қайд этди.

Эртага чемпионатнинг блиц йўналишидан ўрин олган ўйинлар старт олади.