Яриммарафонда 7 ёшдан 70 ёшгача бўлган минглаб аҳоли бирлашди

Ёшу-қарини спортга ошно этиш мақсадида Хоразм вилоятининг барча ҳудудларида кенг кўламли жисмоний тарбия ва спорт тадбирлари ташкил қилиб келинмоқда. Биргина миллионлар ўйини ҳисобланган футбол бўйича «Футболимиз келажаги», «Маҳаллада футбол», «Чарм тўп», «Ҳоким кубоги» ва «Раҳбар кубоги» мусобақаларининг ташкил этилиши орқали деярли барча ёшдаги аҳоли қатламлари оммавий спорт мусобақаларига жалб қилинмоқда.

Шунингдек Хоразм вилояти жисмоний тарбия ва спорт бошқармаси ташаббуси билан жорий йил 12-18 октябрь кунлари бутун вилоят бўйлаб «Спорт ҳафталиги» ташкил қилинди. Мазкур ҳафталик доирасида оммавий бадантарбия машқлари, «Соғлом ҳаёт учун 5000 қадам» лойиҳаси, спортнинг ўйин турлари бўйича «Туман ҳокими кубоги» мусобақалари, «Миллий спорт ўйинлари» фестивали, Хотин-қизлар спартакиадалари, веломарафонлар ва бошқа оммавий спорт тадбирлари ташкил қилинди. Бундан кўзланган мақсад, вилоятдаги ёшу-қари ва эркагу-аёлни жисмоний тарбия ва спортга кенг жалб қилишдан иборат.

Куни кеча ташкил қилинган оммавий юриш марафони «Спорт ҳафталиги» доирасидаги омммавий тадбирларнинг мантиқий давоми ва чинакам спорт байрамига айланиб кетди. «Соғлом ҳаёт сари 5000 қадам» шиори остида Урганч шаҳрининг Ал-Хоразмий шоҳ кўчасида ташкил қилинган оммавий юриш яриммарафонида 7 ёшдан 70 ёшгача бўлган 6000 нафардан ортиқ аҳоли қамраб олинди. Яриммарафони старт чизиғининг олди қаторидан ўрин олган вело ва мото спортчилар, ёш картингчилар мазкур оммавий спорт тадбирини янада кўтаринки руҳда ўтишида ўз ҳиссаларини қўшишди.

Яриммарафон иштирокчиларини тантанали тақдирлаш маросими Урганчдаги Жалолиддин Мангуберди ёдгорлик мажмуасининг олдида ташкил этилди. Яриммарафонда фаол қатнашган иштирокчилар орасидан «Энг ёш иштирокчи», «Энг ёши улуғ иштирокчи», «Фахрий спортчи», «Энг чаққон иштирокчи», «Энг иродали иштирокчи» каби ўнлаб номинациялар бўйича ғолиблар аниқланиб, улар диплом ва эсдалик совғалари билан тақдирланди.

Оммавий юриш бўйича яриммарафонлар вилоятдаги барча туманларда қизғин давом этмоқда.