Йил бошида йилнинг энг муҳим масалалари ҳал қилинди

Йиғилиш кун тартибидан 15 га яқин масалалар ўрин олган олган бўлиб, уларнинг асосий қисми жорий йилда бўлиб ўтадиган мусобақалар ва уларнинг тақвим режасига бағишланди.

Йиғилишни IKA Президенти, Осиё Олимпия Кенгаши Осиё ўйинлари Бош директори жаноб Ҳайдар Фармон бошқариб борди. Унда IKA Бошқарув қўмитаси аъзолари, Ўзбекистон Миллий олимпия қўмитаси ва Ўзбекистон Кураш федерацияси вакиллари иштирок этди.

Дастлаб, қитъавий Кураш конфедерациялари Президентлари жорий йилда ўз қитъларида ўтказилиши режалаштираётган мусобақалар ҳақида маълумот берди.

IKA матбуот хизмати IKA Бошқарув қўмитасида муҳокама қилинган ва тасдиқланган масалаларни эътиборингизга ҳавола қилиб боради. Дарҳақиқат, 2023 йил мусобақалар тиғиз ва кўп эканлиги билан аҳамиятга молик.

25-29 апрель кунлари Хитойнинг Ханчжоу шаҳри катталар ўртасида XII Осиё чемпионатига мезбонлик қилади. Мазкур қитъа биринчилиги сентябрь ойида бўлиб ўтадиган Ёзги Осиё ўйинлари доирасидаги кураш баҳсларига ҳам ўзига хос тайёргарлик вазифасини ҳам ўтаб беради.

Европа Кураш конфедерацияси 26-28 май кунлари Туркиянинг Истанбул шаҳрида Кураш бўйича катталар, ёшлар ва ўсмирлар ўртасида қитъа чемпионатини ўтказишни режалаштирган.

Шунингдек, Панамерика кураш иттифоқи томонидан 8-15 июнь кунлари Халқаро Кураш ҳафталигини ташкил этишни режалаштирган. Ҳафталик давомида Кураш бўйича Панамерика чемпионати, халқаро мураббийлик ва ҳакамлик семинари ва бир қатор тадбирлар бўлиб ўтади. Мезбон сифатида эса Эквадор, Венесуэла ва Никарагуа давлатлари кўриб чиқилмоқда.

Африка Кураш иттифоқи илк бора қитъа чемпионатини Мисрда ўтказишга қарор қилди. Пойтахт Қоҳира шаҳри 6-11 июль кунлари Африка чемпионатига мезбонлик қилади.

Шунингдек, йил давомида Ёзги Осиё ўйинлари, Ёпиқ иншоатлар ва жанг санъатлари бўйича Осиё ўйинлари, Жанубий шарқий Осиё ўйинлари, Африка ўйинлари, Тафиса ўйинларида Кураш баҳслари бўлиб ўтади. 

IKA мусобақалар тақвим режасидан барча қитъавий чемпионатлар олдидан Халқаро Кураш институти томонидан халқаро мураббийлик ва ҳакамлик семинарлари ҳам киритилган.

11-25 август кунлари Кураш ватани Пойтахти Тошкент шаҳрида IKI томонидан спортчиларнинг профессионал тайёргарлигини ошириш мақсадида ўқув машғулотларини ташкил этиш режалаштирилган.

Халқаро Кураш ассоциациясининг 2023 йил мусобақалар тақвим режаси тез орада IKA расмий сайтида эълон қилинади.