Afsonaviy Konstantin Czyu Toshkentga tashrif buyurdi va yosh bokschilarga master-klass o'tkazdi + FOTO

Bugun poytaxtimizdagi "Universal" sport saroyida boks bo'yicha sobiq Evropa va jahon chempioni, professional boksda o'z vaqtida WBC, WBA, IBF yo'nalishlarida chempionlik kamariga egalik qilgan Konstantin Czyu ishtirokida master-klass tashkil etildi.

Milliy olimpiya qo'mitasi hamda O'zbekiston Respublikasi Maktabgacha talim vazirligi hamkorligida o'tkazilgan ushbu tadbir yig'ilganlar o'rtasida katta qiziqishlarga sabab bo'ldi. Mahorat saboqlari oldidan akrobatik shou namoyish etildi. So'ngra tadbirning asosiy mehmoni Konstantin Czyu davraga chiqib keldi va yosh bokschilar bilan mashg'ulotlar olib bordi. O'zbek boksining ertangi kun egalari o'tkazilgan mahorat darslarida o'zlari uchun yangi bo'lgan bir qancha bilim va ko'nikmalarni o'zlashtirdilar.

Ushbu master-klass tadbirni tomosha qilish uchun tashrif buyurgan fahriylar va maktabgacha talim muassasasi tarbiyalanuvchilarida bir olam taassurot qoldirdi. Tadbir davomida muxlislar Czyu bilan suhbatlashib, suratga ham tushishdi.

Master-klassdan so'ng o'tkazilgan ko'ngilochar tomoshalar ham tomoshabinlarga manzur keldi. Tadbir yakunida sobiq bokschiga esdalik sovg'alari taqdim etildi. Milliy olimpiya qo'mitasi nomidan maxsus sovg'ani Bosh kotib Jasur Matchanov topshirdi.

"Yoshim ellikka yaqinlashib qoldi. Ammo, har kuni mashg'ulot o'tkazaman. CHunki, o'zimga-o'zim vada berganman. Sizga ham maslahatim shu. O'zingizga vada bering va buni amalga oshiring. Mashg'ulotlarni to'xtatmang. O'z maqsadingiz sari intilishda davom eting. Albatta orzuingizga erishasiz", - dedi Czyu o'zbekistonlik yosh bokschilarga qarata.

Malumotnoma

To'liq ismi: Konstantin Borisovich Czyu

Laqabi: Thunder from Down Under

Fuqaroligi: Rossiya, Avstraliya

Tug'ilgan sanasi: 1969 yil, 19 sentyabr

Tug'ilgan joyi: Serov, Sverdlovsk oblasti.

Yashash joyi: Rossiya, Moskva.

Professional boksda: 34ta jang (31ta g'alaba, 2ta mag'lubiyat, 1ta jang amalga oshmagan)

Havaskor boksda: 282ta jang (270ta g'alaba, 12ta mag'lubiyat)

Jahon chempionatida:

1989 yil, bronza (Moskva)

1991 yil, oltin (Sidney)

Evropa chempionatida:

1989 yil, oltin (Afina)

1991 yil, oltin (Gyoteborg).