Dana Uayt: "Ngannu qora ro'yxatimda"

"Ngannu mening Oskar De La Xoyya nomidagi qora ro'yxatimda. Frensis Ngannuning u ishlagan boshqa kompaniyalar bilan bo'lgan tarixiga qarang. U yomon odam. Haqiqatan ham yomon odam. Men esa hayotimning shunday bosqichidaman-ki, shunchaki yomon odamlar bilan ish qilishni istamayman. Nima demoqchi ekanligimni tushunyapsizmi? SHunchaki istamayman", — dedi Uayt "Nightcap"ga bergan intervyusida, Jons va Nngannu o'rtasidagi potencial jang haqidagi savolga javob berar ekan.

Malumot uchun, Frensis Ngannu 2022 yil yanvar oyida Siril Ganni mag'lubiyatga uchratganidan so'ng, tashkilotning amaldagi chempioni maqomida UFC`ni tark etgan edi. U tashkilotning hamkorlikni uzaytirish bo'yicha bir nechta takliflarini rad etib, o'z qarorini shartnomaning bir tomonlama shartlari bilan izohlagan.

O'shandan beri "Yirtqich" (The Predator) ikkita yirik boks jangini o'tkazdi: Tayson Fyuriga qarshi ochkolar hisobiga va Entoni Joshuaga qarshi nokaut bilan mag'lub bo'ldi. SHuningdek, u MMA qoidalari bo'yicha ikkita jang o'tkazib, PFL va MVP ligalarida nokaut evaziga g'alaba qozondi.

SHu bilan birga, kamerunlik jangchining nomi tilga olingan har safar UFC rahbari uni tanqid qilishdan o'zini tiya olmaydi. Xususan, Uayt Ngannu UFC ofisiga kelib, tashkilot xodimlarini qo'rqitganini, bir safar esa hatto liga prezidenti bilan jismoniy to'qnashuvgacha borganini davo qilgan.