Ommaviy sport saylida bu safar bokschilar javlon urishdi

Aholi orasida sog'lom turmush tarzini targ'ib qilish, yoshlar orasida jismoniy tarbiya va sportni ommalashtirish maqsadida tashkil etilayotgan mazkur sayllar shu kungacha velosport, taekvondo WTF, gandbol, karate kabi sport turlaridan o'tkazilgandi.

Kuni kecha mamlakatimizda eng ommaviy sport turlaridan biri sanalgan boks bo'yicha ham ana shunday sport bayramiga asos solindi. Bugungi kunda sportning ushbu turiga yoshlarni yanada qiziqtirish, rivojlantirish va ommaviylikni oshirish yo'lida talay ishlar amalga oshirilmoqda. 

Bu borada Milliy olimpiya qo'mitasi va O'zbekiston boks federaciyasi tomonidan viloyatlarda bir qator tadbirlar tashkil qilindi. Jumladan, Namangan, Xorazm, Farg'ona, Sirdaryo, Qashqadaryo va Toshkent viloyatlarida yosh sportchilar uchun musobaqalar, master-klasslar o'tkazildi. Ushbu tadbirlar minglab yoshlarimizni qamrab oldi.

Albatta, mana shunday tadbirlar bolakaylarni sportga qiziqtirish yo'lida katta ahamiyatga ega. Zero, Olimpiya va Osiyo o'yinlari g'oliblari, jahon va qita chempionlari ham o'z vaqtida ana shu yo'l orqali katta sportga kirib kelishgan.