Australian Open-2018 учун махсус: Истоминнинг бўлажак рақиблари, тахминий жуфтликлар ва бошқалар

Мусобақани асосий тўрда 128 нафар иштирокчи бошлайди. Қуръа натижаларини бироз таҳлил қилсак. Яни нимчорак финалда учрашиши мумкин бўлган 8 та энг кучли жуфтликлар ҳақида гаплашишни лозим деб топдик.

Бир бошдан бошласак. Мусобақада Рафаэль Надаль биринчи сараланган теннисчи сифатида қуръа саватчасининг энг юқори қисмидан жой олди. У илк даврада Доминикан Республикаси вакили Виктор Эстрелла билан учрашади. Виктор 37 ёшдалигини ва рейтингдаги ўрнини ҳисобга олсак Надалда муаммолар бўлмаслиги керак. Иккинчи даврадаги рақиби аргентиналик Леонардо Майер ҳамда Чили вакили Николас Жеррилар ўртасидаги баҳсда аниқланади. Демак, испаниялик теннисчининг иккинчи даврада ҳам у даражада қийналмаслиги ойдинлашади. Учинчи даврада Надалга мусобақанинг 28-сараланган теннисчиси - босниялик Дамир Жумхур рақиб бўлиши мумкин. Бунинг учун Жумхур илк даврада италиялик Пабло Лоренси тўсиғидан, иккинчи даврада эса Миллан/Чорич тўсиғидан ўтиши лозим. Ёш ва истеъдодли бўлган Борна Чорич ҳақида ҳам унутмаслик лозим. Надалнинг жароҳати безовта қилмаса, тўртинчи босқичгача унга қийин бўлмаса керак. Агар жароҳат сабаб иштирокини тўхтатса, у ҳолда Борна Чорич ҳамда Дамир Жумхурлар тўртинчи даврага чиқиш учун асосий номзодлар ҳисобланади. Энди Рафаэль Надалнинг нимчорак финалдаги тахминий рақиби ҳақида. Бу ерда турнирнинг 16-сараланган теннисчиси Жон Иснер (АҚШ) бўлиш эҳтимоли юқори. Унга бу йўлда аргентиналик Диего Шварцман қаршилик қилиши мумкин. Украиналик Александр Долгаполов ҳақида ҳам унутмаслик лозим. Биринчи нимчоракдаги тахминий жуфтлик Рафаэль Надаль - Жон Иснер.

Кейинги жуфтликка назар соламиз. Бу ерда ўнинчи сараланган испаниялик Карреньо-Буста ва олтинчи рақам остида мусобақаларга қўйилган хорватиялик Марин Чиличлар ўрин олган. Карреньо-Буста беш ойдан буён жароҳати сабаб расмий мусобақаларда иштирок этмаслигини, илк даврадаги рақиби мезбонлар вакили Жасон Кублер эса ўтган ҳафтада ўз юртида ўтказилган "Плейфорд Челленжер"да ғалаба қозонганлигини инобатга олсак, илк даврада испаниялик теннисчи анчагина тер тўкишига тўғри келади. Карреньо-Бустага иккинчи даврада катта эҳтимол билан франциялик Жиль Симон қаршилик кўрсатади. Жиль Симоннинг илк рақиби Мариуш Копил бўлади. 23-сараланган люксембурглик Жиль Мюллер ҳақида ҳам унутмаслик лозим. Cилич илк даврада Тайван вакили Лу Ён Сунни имтиҳондан ўтказади. Унга қаршилик кўрсатиши мумкин бўлганлар орасида Пабло Куэвас бўлиши мумкин. Ҳозирда яхшигина ўйин намойиш этаётган АҚШ вакили Райан Ҳаррисон ҳам бор. Демак, иккинчи тахминий жуфтлик Карреньо-Буста - Марин Чилич.

Тартиб бўйича учинчи нимчоракдаги жуфтлик. Футбол тили билан айтганда "ўлим гуруҳи". Бу ерда учинчи сараланган Григор Димитровдан ташқари франциялик ўн бешинчи Цонга, мезбонлар вакили Ник Киргиос ва россиялик ёш истеъдод соҳиби Андрей Рублёв, испаниялик Давид Феррерлар мавжуд. Григор Димитровнинг илк даврадаги рақиби саралашдан сўнг аниқ бўлади. Иккинчи даврада ҳам у икки саралашдан чиқиб келган теннисчилардан бири билан учрашади. Димитров учун асосий синовлар учинчи даврадан бошланади. Бу ерда унга Андрей Рублёв ёки Давид Феррер қаршилик кўрсатиши мумкин. Цонга илк даврада саралаш вакилларидан бирини имтиҳондан ўтказади. Иккинчи даврада Цисипас/Шаповалов жуфтлиги ғолиби билан учрашади. Учинчи даврада ҳақиқий теннис жангини кўрсак ажаб эмас. Мезбонлар вакили Ник Киргиос ҳамда Цонга. Бу саватчадаги тахминий жуфтлик Григор Димитров - Ник Киргиос.

Ҳамюртимиз Денис Истомин қатнашиши кутилаётган тўртинчи саватчада АҚШ вакили, саккизинчи сараланган Жек Сок, ўн биринчи сараланган Кевин Андерсон, ўн саккизинчи Люка Пуе, йигирма еттинчи Филип Колшрайберлар мавжуд. Истомин илк даврада франциялик Пьер-Юг Эрберга қарши кортга чиқади. Денис бу рақиб қаршилигидан ўта олади. Иккинчи даврада катта эҳтимол билан Кевин Андерсонга тўқнаш келиши керак. 2016 йилги "Уимблдон"да илк даврада ҳамюртимиз Кевин Андерсон устидан беш сетда ғалаба қозонган. Ўйлаймизки Истомин ушбу ишини яна такрорлай олади. Учинчи даврада Денисга франциялик ёш иқтидор эгаси Люка Пуе рақиблик қилиш эҳтимоли юқори. АҚШ вакили Жек Сок илк даврада япониялик Юичи Сугитага қарши кортга чиқади. Иккинчи даврада катта эҳтимол билан Иво Карлович билан тўқнаш келади. Агар ҳаммаси яхши кетса учинчи даврада Филипп Колшрайбер билан учрашиш эҳтимоли баланд. Шундай қилиб, ушбу саватчада биз учун энг маъқул ва барчамизга ёқаётган жуфтлик Денис Истомин - Жек Сок бўлмоқда.

Навбатдаги бешинчи саватча. Бу ерда жароҳати сабаб иштироки охирги кунларгача номаълум бўлган ва сўнги паллада иштирокини тасдиқлаган швейцариялик Стен Вавринка тўққизинчи рақам остида сараланган. Ундан ташқари бешинчи рақамли Доминик Тим, бу ҳафтада Оклендда ғалаба нашидасини сурган испаниялик Роберто Баутиста-Агут ва 26-рақамли Адриан Моннариноларни ҳам унутмаслик лозим. Вавринканинг илк рақиби латвиялик Ричард Беранкис бўлади. Агар ҳаммаси жойида бўлса, иккинчи босқичдаги рақиб Жерими Шарди бўлади. Учинчи даврада Вавринка/Баутиста-Агут қарама-қаршилигига гувоҳ бўлишимиз мумкин. Доминик Тимнинг дастлабки икки рақиби унчалик ҳам кучли теннисчилар ҳисобланмайди. Австрия вакилига учинчи даврада Адриан Моннарино (26) жиддий қаршилик кўрсатиши мумкин. Катта эҳтимол билан тахминий жуфтлик Доминик Тим - Стен Вавринка.

Кейинги саватчада тўртинчи рақамли Александр Зверев, анчадан буён жароҳатат сабаб мусобақаларда иштирок этмаган Новак Жокович, Гаэл Монфис ва Алберт Рамослар бор. Улардан ташқари ёш истеъдод соҳиблари Данил Медведев, Чон Хён ва мезбонлар вакили Танаси Коккинакислар мавжуд. Александр Зверев илк даврада италиялик Томас Фоббиано билан, иккинчи даврада катта эҳтимол билан қозоғистонлик Михаил Кукушкинга тўқнаш келади. Учинчи даврада қизиқ вазият: бир йўла тўрт нафар теннисчи бир ҳил имкониятга эга. Мезбонлар вакили Танаси Коккинакис, бу ҳафтада Сиднейдаги турнир ғолибига айланган Данил Медведев, 32- сараланган Михаил Зверев ҳамда кореялик Чон Хёнлардир. Бу ерда катта эҳтимол билан (агар Жокович жароҳат сабаб мусобақани тарк этмаса) Александр Зверев - Новак Жокович тўқнашувига гувоҳ бўлишимиз мумкин бўлади.

Тартиб бўйича еттинчи саватчада еттинчи сараланган белгиялик Давид Гоффин, ўн иккинчи Дель Потро, италиялик Фабио Фоньини, Чехия вакили Томаш Бердихлар жой олган. Ундан ташқари ёш истеъдод эгалари Карен Хачанов, охирги вақтлар ажойиб ўйин намойиш этаётган мезбон теннисчи Алекс Де Минаурлар ҳам мавжуд. Давид Гоффин илк даврада саралашдан чиққан теннисчига қарши, иккинчи даврада катта эҳтимол билан Жулен Бенето билан кураш олиб боради. Учинчи даврада италиялик Фабио Фоньини билан учрашиши мумкин. Дель Потро илк босқичда Франсис Тиафони имтиҳондан ўтказади. Кейинги даврада Карен Хачанов рақиб бўлиши мумкин. Учинчи даврада Томаш Бердих билан ҳақиқий кураш кўрсак ажаб эмас. Бу ерда тахминий жуфтлик Давид Гоффин - Хуан Мартин Дел Потро.

Сўнги саккизинчи жуфлик. Қуръанинг пастки қисмида теннис афсонаси швейцариялик Рожер Федерер жойлашган. Ундан ташқари жароҳатдан қайтган Милош Раонич, Сэм Куэрри, Ришар Гаскелар бор. Федерернинг дастлабки рақиби словениялик Алиаж Бедене бўлади. Кейинги босқичда катта эҳтимол билан Ян Леннард Штруф тўқнаш келиши мумкин. Учинчи даврада эса у Ришар Гаске билан тўқнаш келиши кутилмоқда. Милош Раонич баҳсларни Лукас Лацкога қарши бошлайди. Раоничнинг кейинги даврада Николос Кикер ҳамда Жордон Томпсон жуфтлиги ғолиби билаб учрашади. Учинчи даврада катта эҳтимол билан Сэм Куэррига қарши кортга чиқади. Шундай қилиб сўнгги нимчоракдаги жуфтлик Роджер Федерер - Милош Раонич.

Мана барча нимчоракдаги тахминий жуфтликлар билан танишиб чиқдик. Бу жуфтликларни тузишда ўйинчиларнинг маҳорати ва рейтингда эгаллаб турган ўрнини ҳисобга олдик холос. Австралиялик бир фуқаро мезбон теннисчи Ник Киргиосга ғолиб бўлиши учун букмекерлик контораси орқали 30 минг АҚШ доллари миқдорида пул тиккан. Агар Киргиос мусобақада ғолиб чиқса у 1 миллион долларга яқин пул ишлаб олади. Албатта ҳамманинг ўзи мухлислик қиладиган теннисчилари бор. Биз ҳам ушбу нуфузли турнирда юртдошимиз Денис Истоминга мухлислик қиламиз. 15 январдан старт оладиган теннис байрамида ҳамюртимиз иштирокида кўпроқ мазмунли ўйинларни кутиб қоламиз.

Ҳусниддин Мирзалиев тайёрлади