17 ёшли қизалоқ Дубайдаги WTA 1000 турнири чемпиони бўлди

Бу унинг ушбу тоифадаги биринчи соврини бўлди. Мирра эртага эълон қилинадиган янгиланган рейтингда Топ-10`таликда дебют қилади. Финалгача дунёнинг 14-ракеткаси бўлиб келган Андреева бош соврин учун кечган баҳсда WTA рейтингида 38-поғонадан жой олган даниялик Клара Таусонни 7/6(1), 6/1 ҳисобида мағлубиятга учратди. 

Бу теннисчиларнинг ўзаро илк учрашуви бўлди. Бир соату 46 дақиқа давом этган баҳсда Андреева 6, Таусон 1 та эйс зарбасини амалга оширди. Қўшхатолар Миррада биттага кўпроқ бўлди - 5 га 1. Брейклар бўйича устунлик ҳам табиийки ғолиб теннисчи томонида - 4 га 2. 

Мирра Андреева фаолиятидаги иккинчи совринини қўлга киритди. У 17 ёшу 299 кунлигида 2009 йилдан бери ўтказиб келинаётган WTA 1000 тоифасидаги турнирларнинг энг ёш чемпионига айланди. Россиялик иқтидор эгаси 1000 рейтинг очкоси ҳамда 597,000 АҚШ доллари миқдоридаги мукофот пулига эга чиқди. Таусон эса 650 очко ва 351,801 доллар ишлаб олди.