Рамзан Қодиров Лобов - Тухугов жангини ташкил қилмоқчи

Лобов гарчи россиялик спортчи бўлсада, ҳозирда Конор Макгрегор билан бир клубда машғулот ўтказмоқда. Яъни, у ирландиялик собиқ жаҳон чемпионининг жамоадоши ҳисобланади. 

Ёдингизда бўлса, Тухугов яқинда Хабиб Нурмагомедов ва Конор Макгрегор ўртасидаги жанг якунланиши билан октагонга югуриб чиқиб, ирланлиялик спортчини калтаклашга уринганди. Ўшандан кейин Лобов Тухуговни жангга чорлаган эди.  

“Биз бундай чорловларни бажонидил қабул қиламиз. Агар Зубайра Тухугов ва Артём Лобов ўртасидаги жангни UFC доирасида ташкил қила олмасак, у ҳолда исталган яккакураш майдончасида баҳсни ўтказишга тайёрмиз. 

Биз жангни юқори савияда ўтказамиз ва Артёмга яхшигина гонорарни кафолатлаймиз. Ҳамма гап унинг ўзида қолди. Ўйлайманки, Лобов бу гапларни шунчаки кенг оммага мақтаниб қўйиш, шов-шув кўтариш учун айтмаган”, - деди Қодиров.