2025 йилда энг кўп мукофот пули ютган шахматчилар, рўйхатда Нодирбек ва Жавоҳир ҳам бор!

Рўйхатни кутилганидек, шахмат афсонасига айланиб улгурган норвегиялик Магнус Карлсен бошқариб бормоқда. Айнан у миллионлик маррани забт этган ягона шахматчи ҳисобланади. Яқиндагина рапид ва блиц йўналишларида жаҳон чемпионига айланган Магнус 2025 йилда 1 миллион 455 минг 276 АҚШ доллари миқдорида мукофот пуллари ишлаб топган. Бу суммага алоҳида чақирув учун шахматчига берилган пуллар кирмайди. 

Магнус Карлсеннинг энг катта мукофот пули 250 000 доллар, яъни битта турнирда у шунча маблағ ишлаб олган. Америкалик шахматчилар Фабиано Каруана ва Левон Аронян мос равишда 889,598 ҳамда 751,881 доллар мукофот пули билан кучли учликка якун ясаб берган. Каруананинг энг катта гонорари 150, Аронянники эса 200 000 доллар.      

Рўйхатнинг 9-поғонаси Нодирбек Aбдусатторовга тегишли. Блиц йўналишида жаҳон вице-чемпионлигини қўлга киритган биринчи рақамли шахматчимиз 2025 йилги мавсумда 16 та йирик турнирда қатнашиб, умумий ҳисобда $361 811 мукофот пули жамғарди. Унинг йил давомида олган енг катта бир марталик мукофоти $85 000 бўлган.

Яна бир гроссмейтеримиз Жавоҳир Синдаров бу борада 10-ўринни банд этди. У йил давомида 11 та йирик турнирда қатнашди ва натижалари бўйича $349 955 мукофот пули билан кучли ўнталикка якун ясади. Унинг энг катта бир марталик мукофоти $120 000 бўлиб, бу натижа, FIDE Жаҳон кубогидаги ғалаба эвазига қўлга киритилган.