23 мар 09:07
Янгиликлар

Хоккей

40 ёшли Овечкин NHL плей-офф босқичи билан ҳисоблаганда 1000-голини урди + ФОТО

Теглар : Вашингтон Кэпиталс Александр Овечкин

Вашингтондаги "Capital One Arena"да ўтказилган Миллий хоккей лигаси Мунтазам чемпионатининг навбатдаги учрашувида тарихий натижа қайд этилди.

"Вашингтон Кэпиталз" ва "Колорадо Эвеланш" жамоалари ўртасидаги учрашувнинг 55-дақиқасида "Вашингтон" сардори Александр Овечкин ҳисобни тенглаштирди - 2:2. Бу гол россиялик учун Миллий Хоккей Лигасидаги плей-офф босқичини ҳам ҳисоблаганда юбилей 1000-гол бўлди.

Лиганинг бутун фаолияти давомида Овечкин NHL Мунтазам чемпионатининг 1562 ўйинида 923 та гол урди ва 753 та голли узатмани амалга оширди. Плей-оффда 40 ёшли россиялик 161 та ўйинда 77 та гол ва 70 та голли узатмага муаллифлик қилди.

Бунгача Миллий хоккей лигасида 1000 талик довонни фақат бир ўйинчи - Уэйн Гретцки забт эта олганди. Канадалик афсона фаолиятини 1016 та гол билан якунлаган (894 - Мунтазам чемпионат, 122 - плей-оффда).