5та ташаббус: спортимиз юлдузлари паркентлик ёшлар даврасида

Шулардан иккинчи ташаббус - ёшларни жисмоний чиниқтириш, уларнинг спорт соҳасида қобилиятини намоён қилишлари учун зарур шароитлар яратишга йўналтирилган бўлиб, бу борада юртимизда қатор ишлар амалга оширилмоқда.

Бугун Тошкент вилояти, Паркент туман болалар-ўсмирлар спорт мактабида ёш спортчилар билан давра суҳбати ўтказилди. Ушбу тадбирда дзюдо бўйича икки карра жаҳон чемпиони, Олимпия ўйинлари совриндори, “Ўзбекистон ифтихори” кўкрак нишони соҳиби Ришод Собиров, Тошкент вилояти футбол ассоциацияси вице-президенти Асқар Жадигеров, кураш спорт тури бўйича ўн уч карра Ўзбекистон чемпиони, беш карра Осиё чемпиони, фахрийлар ўртасида жаҳон чемпиони Аъзамжон Шокиржонов ва бошқа мутасаддилар иштирокида давра суҳбати бўлиб ўтди.

- Спорт - бу менинг ҳаётим, спорт орқали анча дўстлар орттирдим, дунё кездим ва машҳурликка эришдим. Агар сизлар ҳам спорт йўналишида кетмоқчи бўлсангиз, меҳнатдан қочманг, қийинчиликларни енгиб ўтсангиз албатта келажакда машҳур спортчи бўласиз, - деди Ришод Собиров.

Тадбир давомида ёшлар ўзларини қизиқтирган саволларга жавоблар олишди. Шунингдек, меҳмонлар томонидан тадбир якунида ёш спортчиларга диплом ва эсдалик совғалари тақдим этилди.