23 авг 08:00
Янгиликлар
![](/upload/storage/17905_220.jpg)
Улар ЖЧга борадилар №6: Шаҳрам Ғиёсов
Бухоро бокс мактаби тарбияланувчиси ҳисобланадиган 24 ёшли Шаҳрам Ғиёсов илк маротаба жаҳон чемпионатида қатнашади. Албатта жаҳон чемпионатидаги дебют Шаҳрамнинг тажрибасиз эканлигини билдирмайди. Ғиёсов Ўзбекистонда Рио Олимпиадаси қаҳрамонларидан бири сифатида эътироф этилади.
Шаҳрам 2015 йилда Ўзбекистон чемпионлигини қўлга киритган. 2016 йилда эса лицензион мусобақада иштирок этиб, Риода бўлиб ўтадиган Олимпиадага йўлланмани қўлга киритган. Айнан ўша йили у "Uzbek tigers" сафида WSB жангларида иштирок этган ва жамоа билан ярим финалга қадар етиб борганди.
2016 йилда Бразилияда бўлиб ўтган Олимпиададаги муваффақиятли иштирок Шаҳрамга шуҳрат олиб келди. Боксчимизнинг ғалабани "Роналдуча услуб"да нишонлаши эса чет эл ОАВлари диққат марказида бўлди. Ўз жангини шоуга айлантириб юборадиган Шаҳрам Ғиёсов Рио Олимпиадасида финалгача етиб борди. Боксчи бу йўлда жаҳон чемпиони Муҳаммад Рабиини, шунингдек Олимпиада чемпиони Рониель Иглесиасни мағлубиятга учратганди. Якунда қозоғистонлик Данияр Елиуссиновга имконият бой берилган.
Ғиёсов жаҳон чемпионати йўлланмасини Тошкентда бўлиб ўтган Осиё чемпионатида нақд қилиб олган. Ўшанда у барча рақибларидан устун келиб, Осиё чемпионига айланган.
Ушбу вазн тоифасида Шаҳрам Ғиёсовга Рониель Иглесиас (Куба), Пат МакКормак (Англия), Абасс Бараоу (Германия), Абилхон Жуссупов (Қозоғистон) каби боксчилар рақобат туғдириши кутилмоқда.
Фикримча, Шаҳрам Ғиёсов мазкур турнирда жаҳон чемпиони унвони учун бемалол кураша олади. Мухлислар боксчидан олтин медаль кутмоқдалар. У жаҳон чемпионлигини қўлга киритганидан сўнг яна бир маротаба Олимпиада чемпионлиги учун курашиб кўриши лозим. Ана шундан сўнг Шаҳрам профессионал боксга ўтиши лозим. Чунки, профессионал боксда унга ўхшаган боксчилар ўз йўлини топиб кета оладилар.
Азиз Тўхтамуродов
Фикрлар