Адвокат Кюрасао терма жамоаси бош мураббийи лавозимини тарк этди

Қайд этилишича, 78 ёшли мутахассис соғлиғида муаммолари бор қизи учун ўзини тўлиқ бағишлашга қарор қилган. Адвокат ўрнига Фред Рюттен тайинланди.

"Мен ҳар доим оила футболдан муҳимроқ деб айтганман, шунинг учун бу табиий қарор. Шунга қарамай, мен Кюрасаони, унинг одамларини ва ҳамкасбларимни жуда соғинаман. Кичиккина давлатни Жаҳон чемпионатига олиб чиққанимни фаолиятимдаги энг катта ютуқлардан бири деб ҳисоблайман", – деди Адвокат.

Адвокат Кюрасао термасини 2024 йилнинг январидан бери бошқариб келаётганди. Унинг қўл остида жамоа тарихда илк бор Жаҳон чемпионати финал босқичига чиқди. АҚШ, Канада ва Мексикада бўлиб ўтадиган турнирда Кариб денгизи ҳудудидаги мамлакат жамоаси Германия, Эквадор ва Кот-д'Ивуар терма жамоаларига қарши ўйнайди.

Адвокат илгари Нидерландия, Корея, Сербия, Бельгия ва Ироқ терма жамоаларини бошқарган, шунингдек, ПСВ, "Фейеноорд", "Зенит", "Фенербахче", "Сандерленд" ва бошқа жамоаларда ишлаган.

Рюттен эса "Твенте", "Шальке", "Андерлехт", ПСВ ва "Фейеноорд"нинг собиқ бош мураббийи ҳисобланади.